Bru-te dilna enfiah mek

Tripura relief camp-a Bru, Mizoram electoral roll-a thun luh dilte'n dilna an thehluh chu enfiah mek a ni a, mi eng zat nge pawm an nih a, eng zat nge hnâwl an nih hriat theih a la ni lo.

Vanglaini palai zawhna chhangin chief electoral officer (CEO) Ashish Kundra chuan, electoral roll-a thun dilna pawm leh pawm loh chu a viltu electoral returning officer (ERO)-te mawhphurhna a nih thu a sawi a, "A ṭul dan azirin district election officer (DEO)-te'n an pui thei. Tunah hian refugee camp-a Bru-te dilna endik mek a ni a, thutlukna siam tur chu ERO-te an ni," a ti.

CEO chuan, DEO leh ERO-te tun hnaiah a koh khawm thu sawiin, "Bru-te dilna chu uluk taka endik turin ka chah. An document thil telte a rintlak tâwk em, kum 18 an tling ngei em, Mizoram khua leh tui an ni ngei em tihte uluk taka endik turin kan inhriattir a ni," a ti a; danin a phût ang thlap document neite chu electoral roll-a thun luh theih an nih thu a sawi.

Tarlan tawh angin, Mizoram electoral roll thar February 22, 2019-a tlangzarh tâkah Tripura relief camp-a Bru-te hi an dilna enfel hman a nih loh avangin telh an ni lo. Bru-te pual hian February 26, 2019 khan Kanhmunah hearing buatsaih a ni a, mi 2,500 chuang an inlan a ni.