Zoram Ní pualin hun hman a ni

Nimin March 5 kha kum 1966-a India sorkarin Mizorama bomb a thlâk champha a ni a, he ní hi MZP chuan Zoram Ni tia vuahin Dawrpui Multipurpose Centre leh Mizoram hmun dangahte an hmang. Zoram Ni hmannaa khual­lian Lalchamliana, Home minister chuan, Mizoram chu hmasang aṭangin India mi an ni lo tih sawiin, "Mizoram inde­pendent hi kan chanvo, kan birthright a ni," a ti.

Home Minister chuan, Lalchamliana chuan, "Hmasang ata tu thuhnuaiah mah kan kûn ngai lo a, mahnia ro inrêl hnam kan ni. British-in sipai chakna hmangin min awpbet a, min chhuahsan dawnah India-in fing vervêk takin kan hruaitu hmasate an thlêm thlu a, India danpui an siam pawhin Mizo aiawh tumah an tel lo. A tawpah inthiam chawp nan kan hruaitute mi pahnih an ruat ve chauh a ni," a ti a; India danpui chu Mizote tan 'Barh luih danpui' a nih thu a sawi.

Lalchamliana chuan, Zoram Ni hman a nih tirh lamah inhnialna tam tak a awm a, 'Indian Air Force thlawhtheihnain Aizawl a bomb lo' ti pawl an awm tih sawiin, "IAF-in Aizawl a bomb ngei a, ka mit ngeiin ka hmu ve a ni. Mizoram hi hmasáng aṭangin India mi kan ni lo, Mizoram independent hi kan chanvo, kan birthright a ni. MNF-te chu Mizo mipuite tan an rammú a, Mizo mipuite tan bawk remna an siam leh a ni," a ti.

Mizo ṭhalaite zingah Mizo nationalism-a harh tharna a thleng mek nia sawiin Lalchamliana chuan, "Kan ramah Mizo nationalism leh Indian nationalism a insual mek a ni. Mizo nih hi a zahthlak loh a, kan insit tur a ni lo. Chutih rualin, hnam dangte sit loa hma lam pan tur kan ni," a ti a; Mizo zirlaite chu nationalism rilru púa lehkha an zirnaah taima taka zir turin a chah.

Aizawla Zoram Ni hmanna inkhawm hi MZP vice president B Vanlaltána'n a kaihruai a; MZP adviser Lalnunṭawma Fanai-in Mizo nationalism chungchanga paper a buatsaih a chhiar chhuak a ni.