Ram tana nunna chánte kan hre reng - Duhoma

ZPM Legislature Party leader Lalduhoma chuan Mizoram zalenna atana nunna chánte an hre reng a, zahna an hlan tih a sawi.

Lalduhoma hian nimin khan MZP sub-headquarters-in Reiek Tourist Resort-a Zoram Ni an hmanna a hmanpuinaah thu sawiin, "Zoram zalenna atana nunna chánte hi kan hre reng a, kan súnin zahna kan hlan a ni. Zo fate hian zalenna kan duh em em a, amaherawhchu, kan duh thlanna ni loin British sorkar hnuaiah min luhtir a, kan duh thlanna lo vêkin India sorkar hnuaiah kan lut leh. Mipuite ràwnna tel loin MNF leh India sorkar inremnain India state kan ni leh ta a ni," a ti.

Mizo mipui thinlungah Mizo nationalism kaihthawhin awm thar leh se a duh thu sawiin Lalduhoma chuan, "Indian nih loh hi i hlau lo ngam ang u," a ti a; UNO buatsaiha UNO hnuaia The United Nations Declaration on the Ringhts of Indegenous People (UNDRIP) hmanga zofate zalennana hun tur thlir zel phawt mai turin Mizo mipui a chah a ni.

Reieka Zoram Ni hmannaah hian Zoram zalenna atana nunna chánte sûnna hun hman a ni a; zalenna puannaa hming ziaktu Reiek khaw mi pathum - C Lalkhawliana (finance minister), Zoramthanga (member of parliament) leh R Zamawia (defence minister & army chief)-te hnenah chawimawina an hlan bawk.