Thawktu chuan hlawh a hmu tur a ni - Education Minister

Mizoram SSA Teachers’ Associa­tion chuan nimin khan Electric Veng YMA Hall-ah inkhawmpui an hmang a; an hun hmanpuitu, School Education minister Lalchhandama Ralte chuan, hna thawktu chuan a thawh hlawh a hmu tur a nih thu a sawi.

Lalchhandama Ralte chuan, 'Hna thawktu chuan hlawh a hmu tur a ni,' tih chu a thupui a nih avangin SSA zirtirtute'n hlawh an lâk theihna atan theihtawp a chhuah nghal tih a sawi a, "December 2018 thleng hlawh pek nghal in ni a, tunah hian March 2019 thlenga in hlawh tur state matching share chu sorkarin min pe vek tawh a ni," a ti.

School Education Minister chuan, sorkar laipuiin SSA zirtirtute March 2019 thlenga an hlawh tur a la pek chhuah loh thu sawiin, "Sum harsatna karah state sorkar pûk kan dil a, min pe vek tawh a ni," a ti a; sorkar laipuiin SSA zirtirtute hlawh a tihhniam hnawhkhahna tur pawh state sorkarin a sanction vek tawh thu a sawi.

Minister chuan, SSA zirtirtu kal­khawmte chu naupangte thinlungah ram, hnam leh sakhaw zahna leh ngaih­hlutna tuh turin a chah a; Continuous Com­prehensive Evaluation (CCE) chung­changah, "Kumin academic session ṭan hmain sorkarin CCE hman zui zel tur nge hman zui loh tur tihah thutlukna a siam dawn a ni," a ti a, zirtirtute chu hun vawng dik a, incheinaah pawh fimkhur turin leh ruihhlo laka fihlim ngei turin a chah.

Inkhawmpuiah hian MSSA pre­sident kaihhruaina hnuaiah resolution an pass a; zirtirtu post ruakah SSA teacher-te a tahtawla dah ngheh te, 7th. Pay mila hlawh lak te, primary school-ah pre-primary dahte leh, naupangte'n hma an sâwn theih nan English medium school-ah tun aia uar zawka English hmante a ni.

Chawhnuah MJA kaihhruaiin kum 2019-2021 chhunga office bearer tur an thlang a; president-ah R Lalrinpuia, general secretary-ah Lalbiaknunga leh treasurer-ah Ngairopari te an thlang.