KHAWTHLIR

Thisen pe
Thingsulthliah Branch YMA chuan an branch golden jubilee pualin March 4, Thawhṭanni khan blood donation camp an huaihawt a, Aizawl Civil Hospital tan mipa 52 leh hmeichhia 10-te'n thisen unit 62 an pe. Lawngtlai Bethel Unit ṬKP pawhin Thawhṭanni khan Lawngtlai District Hospital tan thisen unit 14 an pe a, a petute mipa pakua leh hmeichhia panga an ni.

Silai tun tur
Aizawl DC chuan thupek chhuahin, Lok Sabha inthlanpui awm turah mipui an him zawkna atan leh tluang taka inthlan neih a nih theihna atan police station-ah silai tun tur a nih thu a puang. Hei hi Election Commission of India thupek a ni a, silai nei zawng zawngte'n inthlan inbuatsaihna kalpui a nih chhungin an silaite chu an bialtu police station/outpost hnai berah March 15, 2019 ral hmaa tun vek tura a ni.

Handloom Fair
Ministry of Textile hnuaia Development Commissioner for Handloom leh Mizoram Apex Handloom and Handicraft Cooperative Society Ltd. (MAHCO) chuan nimin khan Siamliana Hall, Mamitah Handloom Fair an buatsaih a, district bawrhsap Dr Lalrozama'n a hawng. Fair-ah hian stall panga hawn a ni a, March 7, Ningani thleng a awh ang.

VP-ah la lut
Sports & Youth Services minister Robert Romawia Royte chu nimin khan a pisaah Mizoram Bharat Scouts & Guides (MBSG) vice president atan lak luh a ni a, MSBG state chief commissioner Zothanmawia'n rinawmna thu a tiamtir. MBSG-ah hian member 5,000 vel an awm mek a ni.

Minister-in tlawh
Food, Civil Supplies & Consumer Affiars minister K Lalrinliana chuan nimin khan Bairabi rel chawlhhmun bula tuialhthei dah khawlna tur hmun ruahman a tlawh a, official-te nen hmalak dan tur an sawiho. Tuialhthei dahna tur hmun ruahman hi sq.ft 1,56,000 vela zau a ni a; ruahman dan chuan, rêlin tuialhthei phur lutin dah khawl a ni ang a, oil depot aṭang hian Mizoram chhunga hmun hrang hrangah sem chhuah ṭhin a ni ang.