Pension scheme thar PM-SYM hawn a ni

Nimin khan Ahmedabad-ah prime minister Narendra Modi-a'n pension scheme chi khat, Pradhan Mantri Shram Yogi Maandhan (PM-SYM) a hawng a; PM-SYM pual hian Mizoram hmun hrang hrangah nimin khan hun hman a ni a, Aizawlah chuan Mizoram Youth Commission (MYC) conference hall-ah Labour Employment, Skill Development & Entrepreneurship (LESDE) secretary Zothankhuma hoa hun hman a ni.

Zothankhuma chuan, PM-SYM chu kut hnathawktute leh hna dang thawk, thla khata Rs. 15,000 aia tam lo thawk chhuak ṭhinte'n hamṭhatna an dawn theih nana Ministry of Labour & Employment hmalakna a nih thu a sawi a, "Pension scheme huam chinte'n ṭhahnemngai taka an inziah luh a, Mizoramah pawh hlawhtling taka pension scheme hi kalpui a nih ngei ka beisei," a ti.

PM-SYM hi sorkar laipui pension scheme pawimawh a ni a, Ministry of Labour & Employment hmalakna niin Life Insurance Corporation of India (LIC) leh CSC e-Governance Services India Limited (CSC SPV) nena ṭangkawpa kalpui a ni. February 15, 2019-ah kalpui ṭan niin, unorganised sector huam chhunga hna thawk zawng zawng (kut hnathawk hrang hrang leh ni tin mahnia inhlawhfa – street vendor, construction worker, handloom worker, taxi driver, etc.) thla khata Rs. 15,000 aia tam lo hlawhte tana ruahman a ni.

Scheme dil turte chu unorganised sector hnathawk an nih a ngai a, kum 18-40 inkar an ni tur a ni a, dil duh chuan Aadhar card leh bank account/jan dhan account a nei tur a ni. Employee Provident Fund (EPF), National Pension Scheme (NPS) leh Employees' State Insurance Scheme (ESIC)-a inziak lutte tan a dil theih a ni lo.

Pension scheme hnuaia inziak lutte account aṭangin thla tin pawisa ruahmansa auto-debit hmangin chhûn luh ṭhin a ni ang a, sorkar laipui pawhin hian matching share a dah lut ve ang. Kum 60 tlin hnuah thla tin a tlem berah Rs. 3,000 lak theih a ni dawn a ni.