Khua/veng aṭangin inhnawtchhuak

Kawnpui Village Council-I leh an veng chhunga NGO-te chuan an venga cheng ruihhlo zuar an man Lal­hmangaiha te chhungkua chu March 4, Thawhṭanni khan an veng/khua aṭangin an hnawt­chhuak a; Lalhmangaiha te chhungkua chuan Thawhṭanni vek khan Kawnpui an chhuahsan nghal.

Thu dawn danin, Lal­hmangaiha te hi Kawnpui Hmarvenga chêng an ni a, a nupui leh an fate pathum nena khawsa an ni. Khawtlangin an hnawhchhuahnaah hian Kawnpui V/C-I leh Branch YMA chuan pém lehkha an pe nghal.

Kawnpui V/C-I chhunga ruihhlo dotu Joint Action Force (JAF) chuan February 24, 2019-ah Lalhmangaiha'n damdawi a hralh lai an man a, V/C President a zin chhuah avangin action an la nghal mai lo a, March 2, 2019 zanah V/C kaihhruaina hnuaiah JAF leh V/C-I huam chhunga NGO-te nen an meeting ṭumin, Lalhmangaiha te chhungkua chu V/C-I aṭanga hnawhchhuah an rel ta a ni. Meeting chuan, tun chinah chuan damdawi zuar an man reng reng chuan darkar 24 hmain V/C-I area an chhuahsan fel tur a ni, tiin an rel bawk.