Sele thih chhan chhui chhuah phût

Biodiversity and Nature Conservation Network (BIOCONE) chuan thuchhuah siamin, Lungzarhṭum rama sele, a chhan hriat loha a thi chu pawi an tih thu an tarlang a; a thihna chhan dik tak chiang taka chhui chhuaka hma la turin thuneitute an phût.

BIOCONE chuan, sele thihna kaihhnawiha dan bawhchhiatna thleng nia lang chu chhui chhuak a, dan bawhchhetute hrem ngei turin thuneitute an phût tih an sawi a, "Sele sa chantute man chhuah kawnga YLA, Lungzarhṭum Branch leh police-te hmalakna hi lawmawm kan ti a, an inpêkna kan ngaihlu tak zet a ni," an ti.

Sele chu mihring kut tuara thi ni ngeia rinhlelh a nih avangin, a thih dana pawikhawihtute man chhuahna kawnga pui theitu hnenah BIOCONE-in Rs. 10,000 an pek tur thu an puang a; ramsial/sele chu ramsa vâng, mang mai hlauhawm khawpa tlem tawh a nih avangin Indian Wildlife Protection Act 1972 (IWPA)-in ramsa humhalh ngai tâwpkhâwk (Schedule-1) zinga a dah a nih thu leh, Schedule-I ramsa pêltute chu a nêp ber pawhah kum thum tal tàn leh pawisa chawitir tur a nih thu an sawi bawk.

Association for Environmental Preservation (ASEP) pawhin thu­chhuah siamin, selé a thi chu pawi an tih tak zet thu an tarlang a, "Ramsial thih danah thu chiang hriat ni lo mah se, thu kal vel dan enin thah/kah hlum ngei niin kan ngai a, a titu dik tak chhui chhuak thuai turin thuneitute kan phût tlat a ni," an ti.

March 1, 2019 zinga thia hmuh Lungzarhṭum selé/ramsial hi March 4, Thawhṭanni khan Lungzarhṭum khawtlangin an vui a; a lu chu kawng an zawhpui bakah, a tisate chu kuangah dahin thlànah an phúm a ni.