Thawhrimna, taimâkna leh intodelhna Hmanga vai vêl turin Mizo ṭhalaite fuih
Nimin khan MZP-in Mizoram hmun hrang hrangah Zoram Ni an hmang. MZP headquarters, Lunglei chuan Convention Centre-ah an hmang a, khuallian TJ Lalnuntluanga, minister of state chuan, thawhrimna leh taimâkna leh intodelhna hmanga vai vel turin Mizo ṭhalaite a chah.
Minister TJ Lalnuntluanga chuan, March 1, 1966-ah MNF-in Mizoram independent an puang a, March 5, 1966-ah Mizoram khawpui ber Aizawl chu India sorkarin jet fighter leh bomb hmangin nasa takin a bei tih a sawi a, "Mizoram hmun hrang hrangah India sorkarin a nghaisa zui a. India khan a ramah min ngai a nih chuan enga ti nge bomb hmanga min beih, a ramah min ngai lo tihna a ni tih i hre thar leh ang u," a ti.
TJ Lalnuntluanga chuan, hun harsa leh khirhkhân tak karah Mizoramin hma a sawn hret hret tih sawiin, "Chief Minister-in 'Lapa rawngbawl duh ram leh hnam chu an ding chhuak dawn a ni,' a tih angin, rinawmna, taimakna leh dikna vawng tlat ila, kan ram hi a dam dawn a ni. Lalpa ṭih hian taimakna leh thawhrimna a keng tel a, thawhrimna leh taimakna chuan ram intodelhna min thlen ang. Hnam anga kan intodelh chuan vai kan vêl dawn tihna a ni a, hnam hmangaihna thinlung nen zirna lam thlenga khûm turin vai i vêl ang u," a ti.