Quality education-ah ṭan a ṭul - Dr R Lalthangliana

Mizoram State Higher Education Council (MSHEC) chu nimin khan Higher & Technical Education minister Dr R Lalthangliana hoin HTE directorate conference hall-ah an ṭhukhawm. Dr R Lalthangliana chuan, quality education lamah ṭan lak a ngaih thu a sawi.

HTE Minister chuan, Mizoramin ziak leh chhiar thiamah India ramah pahnihna hauh mah se, quality education leh human resource development lamah ṭan lak a ṭul thu a sawi a, " Ram dangte ûm phâk hmasawnna nei tura thil pawimawh ber zingah zirna a tel. College-a awm ngei ngei tura ngaih department awm lohna college-ahte engtia hmalak tur nge tih ngaihtuahho a pawimawh," a ti.

Sorkar laipuiin ram chhunga zirna sang zawk (higher education) tihhmasawn leh tihchangtlun nana Rashtriya Uchchatar Shiksha Abhiyan (RUSA) a ruahman chu Mizoram pawhin a ṭangkaipui hlea a hriat thu a sawi.

Dr R Lalthangliana chuan, college leh zirna-in dangte Mizoram chhungah pungin a ṭhang chho zel tih sawiin, "Heng hmunahte hian administrative leh academic building-te bakah zirtirtute leh staff-te chenna tur residential quarter changtlun tak thlengin project-ah tel theih ni se, a bik takin ram páwna aṭanga Mizoram college leh zirna ina thawk tura rawihte tan Mizoram chhung­ah rawn thawk a tichâkawm dawn a ni," a ti.