Bru 160-te roll-a thun dilna Pawmsak tlaka ngaih a ni
Tripura relief camp-a Bru-te'n Mizoram electoral roll-a thun luh an dilnate chu enfiah zawh a ni tawh a; mi 160-te dilna chu pawmsak tlaka ngaih a ni a, chief electoral officer (CEO) pawmpui tura thawn a ni dawn.
Tarlan tawh angin, Tripura relief camp paruk awm Bru-te'n Mizoram electoral roll-a thun luh an dilna chu electoral roll ennawn hun pangngai chhungin enfiah hman a nih loh avangin Mizoram electoral roll thar February 22, 2019-a tlangzarh tâkah telh an ni lo. Bru-te pual hian February 26, 2019 khan Kanhmun khuaah hearing buatsaih a ni.
Electoral roll revision-ah hian Bru mi 2,574-in dilna an thehlut a, dilnate chu Kanhmuna hearing neihnaah electoral returning officer (ERO)-te'n an endik hnuah mi 160-te dilna chu pawm tlaka ngaih a ni. Mi 160-te dilna hi CEO-in pawm tlaka a ngaih chuan Election Commission of India (ECI)-ah thawn a ni ang a, ECI-in a pawmpui chuan Mizoram electoral roll-ah thun luh a ni ang.
CEO Ashish Kundra chuan Vanglaini palai zawhna chhangin, district election officer (DEO) leh ERO-te kokhawmin Bru-te dilna chu uluk taka endik tura a chah thu a lo sawi tawh a, "Danin a phût ang thlapa document neite chu electoral roll-ah thun luh theih an ni," a ti.
Mizoram MLA inthlan hnuhnung ber khan Tripura refugee camp-ah Mizorama vote nei Hachhek bialah 5,052, Dampa bialah 935 leh Mamit bialah 3,115 an awm a, an vaiin voter 9,102 an ni.