Principal vangin Hindi zirlaite exam duh lo
Mizoram Hindi Training College Trainees' Union (MHTCTU) bultumin Mizoram Hindi Training College-a zirlaite chuan nimin khan an college principal Louis Hauhnar laka an lungawi lohna an lantir a, an exam duh lo.
MHTCTU hruaitute chuan, an College Principal chu hmun danga sawn a nih loh chuan lungawi lohna lantir zel an tum thu an sawi a, "Trainee-te harsatna hrethiam lo a, trainee-te hnuaichhiahtu Principal hi kan duh lo a, thuneitute'n a rang lama an bântir lo a nih chuan a tàwp thlengin kan do tlat ang," an ti. Zirlaite hi an college gate bulah ṭhukhawmin lungawi lohna thuziak an keng a, resolution 10 an pass nghal.
Zirlaite lungawi loh thu hriat a nih veleh Higher & Technical Education minister Dr R Lalthangliana'n a endik turin HTE joint director Ramhmangaiha leh a thawhpui a tír nghal.
HTE Joint Director chuan college hotute a biak hnuah, MZP hruaitute leh MHTCTU hruaitute a kâwm. Zirlaite chu an lungawi lohna lantir mek titawp turin an ngen a, zirlaite thil phût zinga tihhlawhtlin theih awmte tihhlawhtlin a nih tur thu an hrilh.
Inbiaknaah hian Hindi zirlaite chuan, an Principal kaihhruaina hnuaiah chuan an thlamuan loh thu sawiin, Principal chu sawn a nih loh chuan lungawi lohna lantir chhunzawm zel an tum thu an sawi avangin inremna an siam thei rih lo a ni.
Zirlaite lungawi lohnate
. MHTC-ah zirtirtu kum khata class vawi hnih chauh late an awm, principal-in action a la ngai lo; zirna ṭha min pe turin an phût.
. Mizorama Hindi B.Ed. training-na tihtawp an hrethiam lo, tunah hian Hindi B.Ed zir duh tan Mizoramah zirna a awm tawh lo. MHTC-in Agra lama affiliation an neih chu principal Louis Hauhnar-in a tihtawp vang a ni.
. College leh institution dangah 'absent fine' a awm tawh loh laiin MHTC-ah erawh ni khat kal lohin Rs. 100 chawitir an ni a, chawhnu kal lohin Rs. 200 chawitir an ni. Phuahchawp tak taka 'special fine' tia Rs. 500 chuang inchawitir a tam hle. Sorkar institution ni si, absent fine tam lutuk hi mirethei tan a harsa an ti. Principal chu sum duh lutukah an ngai. Absent fine awm lo a, final exam form fill-up hunah college/institution dang anga attendance 75% lak ve an duh.
. 'MHTC hi pre-service tana din a ni lo a, in-service tana din a ni. Khawngaihna vangin kan training tir che u' titu principal chu trainee-te hmusittuah an ngai a, principal ni tlakah an ngai lo.
. Admission-ah medical fee lak tel ziah a nih laiin, heng fee/fund-te hi zirlai damlo leh sumpái mamawh ngawih ngawih an awmin, hman chhuah ni tawh se an duh.
. Mipa leh hmeichhe hostel-a room tina plug lakthlak vek a ni a, common room-ah chiah dah a ni. Room tinah plug dah leh an phût. Hostel-a awmte'n tui leh electric bill kum khatah mi pakhatin Rs. 2,400 an chawi a, hostel admission fee-ah a tel vek.
. MHTC-a trainee zingah mahni private institution hnuaia thawkte duhsakna uchuak tak pek an ni chu hriatthiam har an ti a, intluktlanna an duh.
. Kum tina trainee-te pangpar pot thawhtir ṭhin chu tih tawh loh an duh.
. Kum tinin trainee/college ID man tur Rs. 100 lak a ni ṭhin a, kum hnih chhungin ID hi vawi khat chiahsiamsak an nih bakah, ID chu Rs. 20 man vel lek turah an ngai.
. College bus-a chuangte'n bus fare thla khatah Rs. 500 an chawi laiin, college/institution dangah chuan semester khatah Rs. 500 lak ṭhin a ni. Mahni lirtheia kalte leh hosteller-ten thla tin Rs. 300 an chawi belh ziah a, college dangte kalphung anga tih ve an duh.