CS-in YMA kumpuan a hawng

Chief secretary Lalnun­mawia Chuaungo chuan March 5, Thawhlehni zan kan Kanan Veng Presbyterian Kohhran Hall-ah Kanan Veng Branch tan YMA Kumpuan 'Ram leh hnam humhalh' a hawng a; Mizo nihna chhuang turin a chah.

Lalnunmawia Chuaungo chuan, ram leh hnam humhalh turin taimakna leh mahni phak tâwkah thawh hreh neih loh a pawimawh thu sawiin, "Rinawmna nunpui ila, kan nun kawng hrang hranga kan rinawm chuan he hnam hi hnam ropuiah kan siam thei ang. Kan hnam nihna leh kan nunphung te, kan hla ṭha tak takte hi vawng nung tlat ila, Mizo nihna hi chhuang ang u," a ti a; chu'ngte chuan hnam lian zawk chîmralna lakah a veng thei tih a sawi.

Chief Secretary chuan, Inner Line Permit (ILP) chu a theih chhung chu neih a ṭha tih a sawi a; chutih rualin, "ILP ngai lo leh YMA kumpuana 'Ram leh hnam humhalh' hman ngai loa kan ram leh hnam a ngheh hun a nghahhlelhawm a, ṭan lak sauh sauh kan ngai a ni," a ti.