Khaw pathumin lawmman dawng

Faina kawnga India ramin hma a sawn zual theihna tura kum tina faina kawnga inelna, Swachh Survekshan-ah kumin hian Mizorama khaw pathumin lawmman an dawng.

Swachh Survekshan-ah hian khawpui tê (small city) zingah Champhai-in ‘Cleanest City Award' a dawng a, Lunglei-in ‘Best City in Innovation & Best Practices Award' dawngin, Vairengte-in ‘Best City in Solid Waste Management Award' an dawng. Lawmmante hi nimin khan Vigyan Bhavan, New Delhi-ah sem a ni.

Kum 2016 aṭang khan Swachh Survekshan hi Ministry of Housing and Urban Affairs hnuaiah kalpui

ṭhin a ni a, Mizoramah pawh Swachh Bharat Mission (Urban) chu Urban Development & Poverty Alleviation department hmalaknain kalpui a ni.

Inelnaah hian India ram chu zone pangaah ṭhen a ni a, North East Zone bik chu mihring tam dan azirin category hrang hrangah ṭhen a ni leh a; Mizoram khawpui tam zawk chu khawpui tênau category-ah an dah.

India rama khaw fai inelna Swachh Survekshan hi khawvela faina inelna lian ber niin, khaw 4,237 an tel a, mihring nuai 4,000 chuang telna inelna a ni a; Mizoram bikah chuan census town 23-te an tel vek a ni.