MNYF-in sorkar hmalakna ropui an ti

Mizo National Youth Front (MNYF) vice pre­sident Lalremruata Chhangte chuan nimin khan Aizawl Press Club-ah thuthar thehdarhtute a kâwm a; thla hnih chuanga upa MNF sorkar hnathawhte tarlangin, "Sorkar thar lak luh aṭangin thla hnih chuang âwrh kan hmang chauh a, chumi chhunga MNF sorkarin hma a laknate hi MNF ṭhalai ropui kan ti tak zet a ni," a ti.

Lalremruata Chhangte chuan, chief minister Zoramthanga hmalakna azarah Aizawl khawpui lailia awm Assam Rifles-te chu Zokhawsanga sawn chhuahna order a chhuak nia sawiin, "February 19, 2019 khan Union Home Ministry chuan order tichhuakin, May 31, 2019 hmaa insawn chhuak turin a hriattir a ni," a ti a; CM hlui Lal Thanhawla'n theih loha an ngaih MNF sor­­karin a ti dawn ta nia sawi­in, Zoramthanga kaih­hruai sorkar a ding chu van­neihthlak an tih thu a sawi.

MNYF Vice President sawi danin, MNF minis­try hmasa ber kum 1987-a Laldenga hoa a lo pianin Assam Rifles sawn chhuah tumin hma an la a, a hmun tur tifelin, zangnadawmna cheng nuai 92.59 pek chhuah a ni. MNF ministry a tluk avangin tihpuitlin hman a ni lo. Kum 1998-a Zoramthanga kaihhruai MNF ministry a pian leh hnuah hma an la a, Ministry of Home Affairs (MHA) aṭangin AR sawn chhuahna tur cheng vbc. 140 chuang hmuh a ni.

Kum 1998 - 2008 chhung MNF an sorkar laiin Central-ah Congress an sorkar avangin AR sawn chhuak turin MNF sorkarin hma a la chak thei lo nia sawiin Lalremruata chuan, "MPCC chuan MNF sorkar hmalakna tihṭhuanawp tumin, mipui hnena AR Lammual hlan a nih lohna turin resolution an pass nghe nghe niin chanchinbu ṭhenkhatah ziah a ni (Zozam Times 1.12.2005)" a ti.

December 2018 aṭanga MNF sorkar a din leh hnuah CM Zoramthanga AR sawn chhuahna turin hma a la nghal nia sawiin MNYF Vice President chuan, "CM Pu Zoramthanga’n January 15, 2019 khan Union Home minister Rajnath Singh a sawipui," a ti a; MNF sorkar thla thum a tlin hmaa AR sawn chhuahna order tihchhuah a ni ta chu lawmawm an tih thu a sawi a ni.

Lalremruata Chhangte chuan, Congress sorkar laiin hmun tinrengah kawngpui a chhia nia sawiin, MNF manifesto-ah kawngpui awm sa siam ṭhat a nih tur thu telh a ni tih a sawi a; "MNF a sorkar veleh Bawngkawn kawng siamṭhat nghal a ni a, Durtlang kawng chu a pumin blacktop nghal a ni. Seling-Tuirial leh Kolasib-Vairengte kawng siam nghal a ni a, Champhai kawng siamna tur sum ṭhahnem tak dah a ni tawh. Serkhan-Bagha kawng siamtu ABCI chu an hnathawh a chhiat em avangin sorkarin a suspend a ni," a ti.

MNYF Vice President chuan, sikul kai hun tihdanglamna tur thupek chhuah a nih tawh thu te, blood processing fee tihtawp nghal a nih thu te, zu zawrh titawp turin dan duan mek a nih thute a sawi bawk.