KHAWTHLIR

CM-in kâwm
Nimin khan chief minister Zoramthanga chuan a pisaah Sinlung Hills Council (SHC) hruaitute a kâwm. SHC huam chhunga hmalakna pawimawh hrang hrangte an sawiho a ni.

Minister-in hmanpui
Zampuimanga Group YMA chuan March 5, Thawhlehni zan khan Bairabi YMA Hall-ah conference an hmang a, minister K Lalrinliana'n a hmanpui. Minister chuan, sorkar leh YMA chu ram leh hnam hmasawn nana theihtawp chhuah dun tur an nih thu a sawi a, ṭanpui ngaite ṭanpui kawngah a ṭul anga thurâwn pe ṭhin turin YMA member-te a sáwm.

MRB branch thar
Mizoram Rural Bank (MRB) branch 85-na, Sakawrdai Branch chu nimin khan Aizawl DC Vanlalngaihsaka'n a hawng. MRB branch thar hi MRB, Sakawrdai Branch office-ah hawn a nih hnuah, Sakawrdai community hall-ah inkhawm buatsaih a ni.

Hmalak duh
Indian Chamber of Commerce joint director Paromita Bhowmick chuan March 5, Thawhlehni tlai khan Commerce & Industries minister Dr R Lalthangliana a pisaah a kâwm a, Mizoramah sumdawnna lian zawkte inpeipunna (invest) turin hmalak an duh thu a hrilh.

Siaha MJA
MJA, Siaha District chuan March 5, Thawhlehni khan Siaha Press Club-ah Annual Conference vawi 34-na an hmang. Inkhawm hi Siaha MJA vice president M Baithai-in a kaihruai a, president V Pawhla-in thu a sawi. Anti Tobacco Squad consultant ZT Vawra Hmar-in vaihlo dona chungchang a sawi a; Siahaa PWD executive engineer Lalthan Zuala hnenah chawimawina an hlan. 'Internet chak leh changtlung zawk kan neih theih nan hmalak ni rawh se,' tih resolution an pass bawk.