Sap ṭawng thiam tur a ni a, Mizo ṭawng tihdazât nan hman tur a ni lo - Dy. Speaker
Mizoram Legislative Assembly deputy speaker Lalrinawma chuan nimin khan Ṭawitlang Group YMA Conference vawi 43-na, Rúllâm khuaa Vûttaia Rûna neih a hmanpui a, English thiam a pawimawh rualin, Mizo ṭawng tihdazât nan erawh hman hauh loh tur a ni tih a sawi.
Lalrinawma chuan, sap ṭawng uar leh lutuk chu hnam tan a pawi tih sawiin, "Sap ṭawng hi thiam tur a ni a, mahse, kan ṭawng tihdazât nan kan hmang tur a ni lo. Sap ṭawng hman hunah kan hmang ang a, Mizo ṭawng hman hunah kan hmang mai tur a ni. Committee pawimawhah sap ṭawnga thil sawi kan uar lutukte hi a pawi. Ṭawng hi Pathian min pek ropui tak a ni a, theih ang tâwka humhalh hi kan tih tur a ni," a ti.
Assembly Deputy Speaker chuan, politics-ah thil tê tham nia lang pawh sawi fo a nih chuan a punlun a, thil pawi tak a ni thei tih sawiin, "Kan tih loh tur lo palh leh kan sawi loh tur kan sawite min hriat rengsak loh avangin lawmthu ka hrilh che u," a ti a; sorkarin flagship programme an nei tih sawiin, chu chu tihlawhtling turin theihtawp chhuahpui turin YMA member-te a sáwm.
YMA chu Zosap missionary-te din a nih angin Kristian nun dan ṭha ngaihsan nen a inhmeh a, Zo nun mawi leh Kristianna mawi taka kal kawptir thiam a pawimawh tih sawiin Lalrinawma chuan, "Tunlaiah ṭhalaite'n hun âwl kan ngah lutuk hi thil ṭul lo tih nan kan hmang nasa hle, hei hi kan ram hmasawnna dâltu lian tak a ni. YMA member-te chuan kan chheh vela thil awmte kan hman ṭangkai thiam a ngai a, thawh hreh nei loin, a ṭul ṭul kan thawh hian YMA motto kan tihhlawhtling tihna a ni," a ti.
Ṭawitlang Group YMA Conference hi an secretary Lalbiaknia'n a kaihhruai a; nimin khan rorel inkhawm an nei a, vawiinah intihsiakna leh intihhlimna hun an hmang dawn a ni.