Minister-in FOCUS Project a hawng

Society for Climate Resilient Agriculture in Mizoram (SCRAM) chuan nimin khan Assembly Annexe confe­rence hall-ah ‘Fostering Climate Resilient Upland Farming System in the North East (FOCUS) Project' hawn inkhawm an buatsaih a, Agriculture minister C Lalrinsanga'n a hawng.

Agriculture Minister chuan, Mizote lo neih dan ṭhan jhum cultivation avangin ram leilunga thlai tana chaw a chereu nasa tih sawiin, "Sik leh sá inthlak thleng dan danglam nasa tak avangin kan ramin ruahtui a dawn dan a danglam ta zel a, kan tuihnár ṭhenkhatte pawhin kang cháng a nei ta fo mai," a ti a; jhum cultivation tibo chuang loa ram leilung hausakna bo tur veng chunga lo neitute tana hlâwk zawka lo an siam theihna turin FOCUS din a nih thu a sawi.

FOCUS Project hawn inkhawmah hian chief secretary Lalnunmawia Chuaungo-in inlawmna thu a sawi a, FOCUS state project director RK Nithanga'n FOCUS ṭan a nih dan leh kalpui dan tur a sawifiah.

FOCUS Project hi India ramah Mizoram leh Nagaland-ah chiah kalpui a ni a, project inbuatsaihna chu January 25, 2018-ah ṭan niin, January 25, 2024-a zo hman tura ruahman a ni. Project atan cheng vbc. 539.272 ruahman a ni a; Champhai, Kolasib, Serchhip leh Mamitah hma an la dawn a, RD block 11, khaw 272, in 64,500 leh mi 3,22,500 huam thei tura tih a ni.