ASHA mobilizer-te tan training nei

National Health Mission (NHM) hnuaia Community Process Programme chuan March 5, Thawhlehni aṭang khan Health Services conference hall-ah ASHA mobilizer-te tana refresher training an buatsaih a, NHM mission director Dr Eric Zomawia'n a hawng. Training hi nimin khan neih leh a ni a, vawiinah pawh chhunzawma khâr a ni ang.

Dr Eric Zomawia chuan, ASHA mobilizer-te hnathawh pawimawhzia sawiin, tih tak taka thawk turin a fuih a, "Hriselna kawnga ram hmél tidanglam dâwrh theitute in nih avangin phûr leh thatho taka hna in thawh hian malsawmna ropui tak in thlen a ni," a ti. Training-ah hian chaw ṭha ei chungchang, health & sanitation, nu nau pai chungchang, naute hnute pek dan dik, nu, naute leh khawtlang hriselna chungchangahte an inzirtir a ni.

ASHA mobilizer-te hi ASHA-te zirtir tur leh puih an ngaih apianga puitute an ni a; mobilizer pakhatin ASHA (accredited social health activist) 10-20 zel zel an enkawl. Mizoramah ASHA 1,091 leh mobilizer 109 an awm mek a ni.