Lunglei MUP-in inkhawmpui an hmang

Mizo Upa Pawl (MUP) headquarters, Lung­lei chuan nimin khan Lunglei College multi­purpose hall-ah inkhawm­pui an hmang a, Lunglei High Powered Committee (HPC) vice chairman Lawmawma Tochhawng-in a hmanpui.

Inkhawmpui hi Lung­lei MUP president Sanghlira Colbert-in a kaihruai a; Lawmawma Tochhawng chuan, MUP chu pawl entawntlak, Mizoram ti-Mizoramtu an nih thu sawiin, "Upate hi rohlu in ni a, naupang zawkte'n in nunah zir tur kan ngah hle. Zirna in ṭha, vantlang hmun ṭha tak tak kan neihte hi upate vang a ni," a ti. Lawm­awma hian Lunglei MUP chu Rs. 10,000 a pe a ni.

Mizoram Upa Pawl (MUP) general head­quarters president RK Thanga pawhin thu sawiin, "Upate'n kan vei ber chu ruihhlo vanga ṭhalai thi an tam lutuk leh central service-a lut an tlem lutuk hi a ni. Engmah ti thei lo tura inngai loin, upate hlutna tipungin, faina leh thianghlimna ngai pawimawha mite tana malsawmna nih ṭheuh i tum ang u," a ti.

MUP Headquarters, Lunglei hi July 12, 1975 khan din a ni a, unit 131 awmin, member 10,036 an awm mek a ni.