Inkharkhip laiin zu lak tum an awm reng Police/LTF-in zu man ṭhin

Vanglaini palaiin April 3, Zirtawpnia Hunthar Veng aṭanga Sairang thlenga thawktu hrang hrang a kawm kualna  aṭanga hriat danin, Zero Point (Millennium Square)-ah Sairang Task Force mi 10 vel leh police pahnih an duty ṭhin. Sairang VTF hruaitute chuan, Lengpui, Nghalchawm, Sair ang Dinthar, Lengte, Sihhmui aṭangtein Rangvamual leh Phunc hawnga zu zawng an kal ru fo tih sawiin, "Kawngpui pang ngai zawh loin, kal khàn hrang hrang 5/6 vel an nei," an ti. Phunchawng aṭangin tui phur motor pasarihte'n ni khatah vawi 6/7 vel tui an phur a, zu an phurh tel ṭhin avangin an mansak ṭhin tih an sawi.

An sawi danin, tun hnaiah pawh Mualkhang Gas Bottling Plant-a pek tur zu litre 20, Diald âwka pek tur litre 10 leh Rulpuihlima mi tur litre 20 an man a, zu fûn an man deuh reng bawk. Zu an mansak zingah Aizawl aṭanga kal an awm lo a, Sairang leh an khaw chhehvela mite an ni. "Zu kan mante chu police-ah kan dah thla ṭhin," an ti.

Sairang khawtlang hian total lockdown an puang a, tlai dar 5 aṭanga zan dar 10 thleng tui chawi an remti. Chu chu hrethiam loin tui chawi ṭhinte chuan bialtu MLA-ah an thlen ṭhin. Sairang VTF duty-te chuan, "Ni dangah chuan ni khatah vawi tam tak an chawi thei, kan phal. Mahse, zu phurh chu kan remti lo," an ti.

Zero Point bakah hian Sihhmui, Dinthar leh Dawrkawnahte police an duty a ni. Vanglaini palaiin a tlawh lai hian Phunchawng leh Rangv amual khawlai a reh hle a, two wheeler leh lirthei dang tlan leh kawngpui sira ding hmuh tur a awm mang lo. Hunthar Venga Company Pengah police 10 vel an duty reng a, police duty-te hi zing dar 8 - tlai dar 6 leh tlai dar 6 - zing dar 8 angin duty an inchhâwk ṭhin. Police hotu pakhat chuan, "Zu litre thum mante kan nei a, a ṭhen chu LTF-in offi ce kal tur anga insawi lehkha an siamsakte an ni. Kan leihbaw vek ṭhin," a ti.

Rangvamual lam aṭanga chhote chu Police leh Excise mi pawh ni se an enfi ah (check) vek ṭhin tih sawiin, "Tun hnaiah tak hian min paltu an tlem deuh tawh," a ti a; police ṭhenkhat, Rangvamual lama tih tur neia insawi, kal tlangtir loa an lettir lehte pawh an awm tih an sawi. Company Péng hêla Zarkawt thlânmual lama kala Rangvamual mawng lam aṭanga kala zu la an tam tih sawi a awm avangin Hunthar Veng LTF-te chu March 30, 2020 aṭangin hmun pathum - Mualdungsei, Middle School kawt leh Zarkawt thlânmual kawng ahte an duty ṭan.

Hunthar Veng LTF hruaitute chuan, "RV mawngah khuan mi 300-te an zuk inhmu khawm ṭhin. Khu laia tam tak an zu awm khawm khu a ṭha lo, Covid-19 vanga social distancing kan ngaih pawimawh avangin kan duty a, huante pawh a tam avangin feh tak tak pawh an awm ve bawk a, lui kal pawh an tam bawk. Hri léng karah a ṭha lo, zu hi kan thupui ber a ni lo," an ti.