By-election hun sawn dawn lo
Election Commission of India (ECI) chuan, Serchhip biala MLA by-election neih hun tur leh vote chhiar hun tur chu sawn dilna lut mah se, sawn loh turin thutlukna a siam.
ECI-in inthlan ní atana a ruat April 17 chu Inrinni a ni a, Seventh Day Adventist ni serh a ni. Vote chhiar hun tura an ruat May 2 chu Pathianni a ni thung. Hei vang hian Chief Minister, Mizo Conference of 7th Day Adventist, political party leh páwl dang ṭhenkhatte'n inthlan hun sawn turin Election Commission of India an ngen a ni.
ECI chuan nimin khan inthlan hun sawn ngentu hrang hrangte lehkha thawnin, inthlan ní leh vote chhiar hun chu thil hrang hrang ngaihtuah hnua ruat a nih thu a tarlang a, sawn theih a nih loh thu a hriattir a ni. Hetih lai hian, tun ṭum inthlan tur hi Covid-19 avangin ECI chuan vote thlak theih hun a pawtsei a, zing dar 7 aṭanga tlai dar 6 thleng vote thlak theih a ni ang.
Seventh Day Adventist hruaitute chuan, ni tlak huna vote thlak theih a nih dawn loh chuan vote an thlak dawn loh thu an lo tarlang tawh a ni. Serchhip biala Assembly by-election neih turah hian political party hrang hrangte chu ngawrh takin an campaign mek a, April 15, 2021 Ningani tlai dar 6 thleng campaign theih a ni ang.