Hri vangin vâwk 633 a thi tawh : Sample test result hriat a la ni lo
Tun hnaia vawk hri léng avangin Mizoram hmun hrang hrangah vawk 633 a thi tawh. Hetih lai hian, vawk thih chhan finfiahna atana sample National Institute of High Security Animal Diseases (NIHSAD), Bhopal-a thawn chu a result chhuah hun tur hriat a ni lo.
Vanglaini palai zawhna chhangin AH&Vety minister Dr K Beichhua chuan, Bhopal-a vawk sample test result chhuah hun tur a la hriat loh thu a sawi a, "NIHSAD hian an test zawh hunah pawh keini chuan kan puang thei chuang lo. African Swine Fever (ASF) a nih chuan central ministry lamin an puang ang. Finfiahna la awm chiah lo mah se ASF a nih ngei kan ring. A damdawi a la awm miau loh avangin invèn hi tih theih awmchhun a ni," a ti.
Dr K Beichhua chuan, Mizoramah vawk hri a luh lohna atan theihtawp an chhuah tih sawiin, "Kan hriat loh leh vèn phak lohah, hmun dang aṭanga vawk leh a sa la lut an awm avanga hetiang dinhmun kan thleng ta hi pawi kan ti tak zet a ni," a ti a; vawk hri lénga a mawhphurtu sorkarin a chhui mek thu a sawi.
Hetih lai hian, nimin khan AH&Vety Minister hoin a pisaah department hotute an ṭhukhawm a, hmalak zel dan tur an rél. Nimin chawhma lam thleng khan hri léng vangin tun hnaiah vawk 633 a thih tawh thu tarlan a ni.
Ṭhutkhawma tarlan danin, hri léng hi ASF ni ngeia hriat a nih avangin, vawk kah rài (artificial insemination) kalpui mek chu tihtawp nghal a ni a; hri léng hmuh ṭanna Lungsen khuaah College of Veterinary Science and Animal Husbandry (CVSC), Selesiha doctor zir zo tawh, internship ti mekte tirh an ni bawk.
