Myanmar ram aṭanga rawn lut Covid-19 vei hmuh chhuah a ni

Myanmar tualchhung buaina avanga Tahan aṭanga Mizorama rawn lut nia hriat tlangval kum 24 mi, Aizawla rawn thleng hlim chu nimin khan Covid-19 vei a ni tih hmuh chhuah a ni.

Upper Republic Local Task Force (LTF) Secretary-in Vanglaini palai a hrilh danin, tun hnaia Myanmar aṭanga ráltlân Mizorama lut tlangval kum 24 mi pakhat chuan Pathianni zan khan Champhai aṭangin maxicab hmangin Aizawl panin, nimin zing khan Zemabawk a thleng a, Zemabawk aṭangin taxi hmangin Siamliana, Upper Republic-te in a pan leh a ni.

Covid-19 hluar thar leh avangin Upper Republic LTF hian Myanmar aṭanga ráltlân rawn lutte chu an vengah mikhual loh phawt an rêl tih sawiin LTF Secretary chuan, "Pu Siamliana-te chhungkua hian Myanmar aṭanga mikhual an neih thu LTF-ah an rawn thlen a, a rawn thlen tawh rau rau chuan swab sample endiktir turin kan ti nghal a, Aizawl Hospital-ah RAT an ti a, vanduaithlak takin a lo positive ta a ni," a ti.

Upper Republic LTF tarlan danin, Tahan tlangval kum 24 mi hi tun hmaa Siamliana te thingpui dâwra thawk tawh ṭhin a ni a, chu vanga anmahni hi rawn pan a ni. Covid-19 a vei tih hmuh chhuah a nih hnuah Aizawl Hospital-a Isolation ward-ah dah nghal a ni a, nimin vek khan Durtlang BSUP CCC-ah dah luh a ni. Siamliana te chhungkua pawh an ina inkhung rih tura hriattir an ni bawk.

Myanmar aṭanga ráltlân Mizorama lutte swab sample endik chungchangah hian Vanglaini palai zawhna chhangin Champhai DC Maria CT Zuali chuan, sorkara inhriattirte chu an swab sample endik ṭhin a nih thu a sawi.

Champhai Bawrhsap chuan, sorkara inhriattirte sample RAT hmanga endik ṭhin a nih rualin, sorkara inhriattir chu tlem tê an nih thu a sawi a, "Sorkara rawn inhriattir hi ráltlân rawn lut zinga hmun thuma ṭhena hmun khat vel bak an ni lo ang," tiin, a tam zawk chu swab sample endik loh an nih thu a sawi a ni.