Covid-19 hri thar kái an awm rih lo

Mizoram sorkarin Covid-19 thawh hnihnaa hri thar kái an awm leh awm loh finfiahna tura tun hnaia phai lama swab sample a thawn zinga sample 80 result hriat tawh niin, a negative vek a; sample dang test result nghah mek a ni.

Health department hotute chuan, Covid-19 thawh hnihna kài leh kài loh endikna chu India ramah 10 chiah a awm tih an sawi a, "Mizoramin a hnaih ber chu West Bengal-a National Institute of Biomedical Genomics a ni. Tun hnaia Covid thawh hnihna lên hnua Mizorama lo lutte sample kan thawn zingah 80 chu an negative tih finfiah a ni tawh a, sample dang result kan la nghak mek," an ti a; Mizoramah Covid thawh hnihna kái an la awm loa a lan thu an sawi.

Health department hotute'n Vanglaini palai an hrilh danin, Covid-19 thawh hnihna kái an awm leh awm loh finfiah turin Zoram Medical College-ah hmanrua a awm lo.

Hetih lai hian, Covid-19 laka invênna damdawi (vaccine) Covishield chuan Covid-19 thawh hnihna hri léng zinga South African strain tih loh, strain dang zawngah hna a thawk tih finfiah a nih tawh a, South African strain-ah pawh zir chian mek a nih thu Health department hotute chuan an sawi a ni.