KHAWTHLIR

Thisen pe
School of Nursing, Thingdawl zirlaite chuan Evangelical Nurses Fellowship (ENF) Day pualin nimin khan Kolasib District Hospital tan thisen unit 20 an pe a, petute hmeichhia 19 leh mipa pakhat an ni a; Johnson College NSS pawhin Aizawl Civil Hospital blood bank-ah pein, mipa 14 leh hmeichhia parukin unit 20 an pe. Hnahthial North bial ṬKP chuan Inrinni khan BCM Electric North sunday school hall-ah Christian Hospital, Serkawn tan thisen unit 55 an pe a, a petute mipa 42 leh hmeichhia 13 an ni.

YMA CCC thulh
Central YMA chuan, YMA Central Coordination Committee (CCC) ṭhutkhawm a koh tawh chu ṭhulh a nih thu an tarlang. CCC meeting tur ṭhulh hi Covid-19 hripui thawhhnihna léng mek avang leh thuneitute hnen aṭanga meeting phalna an hmuh theih loh vang a ni.

Inkaihhruaina tihdanglam a ni
Mizoram sorkar chuan April 9, 2021-a inkaihhruaina a tihchhuah tawh ṭhenkhat a tidanglam a; infiamna lama inkhelh leh tournament buatsaihte chu entu mipui tel loa huaihawt tur a ni. Puipunnaa ei leh in siam/ sem chungchang chu paih niin, chhiatni/ ṭhatni-ah ei leh in siam/ sem phal a ni lo.

SRH-ah mi 13 awm
State Referral Hospital-ah nimin khan Covid-19 vei mi pakhat dah luh a ni a, mi pakhat a thi thung a, heti hian SRH-ah Covid-19 vei mi 13 enkawl mek a ni. SRH-ZMC Bulletin tarlan danin, mi 13 zinga pakhat chu ICU-ah awmin, ventilator hmantir mek a ni a, mi dang zawng Isolation ward-ah awmin, harsatna lian tham nei an awm lo.

Inbuatsaih dan rêl
Lawngtlai additional DC Marilyn Rualzakhum­thangi hoin nimin khan NDRF 1st Batallion-in Familiarisation Exercise (Famex) an buatsaih tur chungchang leh a bawhzui dan tur sawiho a ni.