State páwn aṭanga rawn lutte lakah Kan inrin lâwk a ngai - Health Minister

Health minister Dr R Lalthangliana hoin nimin khan Covid-19 Medical Team chairman Dr ZR Thiamsanga leh department official-te'n Secretariat conference hall-ah Covid-19 chungchang an sawiho. Health Minister chuan, state páwn aṭanga lo lutte lakah uluk taka inrin lâwk a ngaih thu a sawi.

Health Minister chuan, hma hun hriat lâwk a nih loh thu sawiin, "Mi 400/500 lai pawh hri vei pung leh thut thei kan ni. Sum leh pai mamawh awm tur te, mihring leh lirthei mamawh turte lo siam fel thuai thuai a ngai. State dang aṭanga rawn hawte lakah medical team pawh uluk taka kan inrin lâwk a ngai," a ti.

Dr R Lalthangliana chuan, vawiin (Thawhlehni) hian Lengpui Airport-ah thlawhtheihna lian pali a thlen dawn thu sawiin, "Passenger an tam dawn avangin keini lam pawh kan inbuatsaih lâwk a ni. Vairengte hi an rawn luh tamna a ni a, kan uuk a ngai bawk," a ti a, Vairengte Screening Point chu April 16, 2021-ah a tlawh dawn thu a sawi.

Khawpui chhunga Covid-19 vei leh vei loh enfiahna Random Sampling Test (KIOSK) din belh chungchangah R Lalthangliana chuan, "Thawktu indaih lohnaah a veng neitute'n mi pali/panga vel an lo tum ve theih chuan hmalakna a awlsam sawt ang. Covid-19 vaccine mamawh ang hmuh a nih theih nan Union Health Secretary hnenah telephone leh ziakin ka thlen ang," a ti.

Health Minister chuan, Covid-19 do kawngah Health department chu nodal department an ni satliah lo tih sawiin, "Health department hian hma kan hruai a ngai," a ti a, hma hruaitu an awm chuan department dang pawh an koh eih ṭhin thu a sawi.

Covid-19 Medical Operation Team hotu Dr ZR Thiamsanga, MLA chuan, chhiatní ṭhatní-ah khauh lehzual a ngaih thu sawiin, "Border area velah lut an awm reng a, hengahte hian duty pawh a ṭhat a ngai. Thawktu indaih loh kawngah pawh ṭan lak a ngai a, random sampling test hi ti thei zel ila ṭha ka ti khawp mai," a ti.

Ṭhutkhawmah hian Mizoram hmun hrang hranga inbuatsaih dan tur te, hmalak mek dan te, vaccine indaih loh leh pek chungchang te, thawktu indaih lohna leh lirthei indaih lohna phuhrûk dan turte an sawiho a ni.

Meeting-a tarlan danin, mi 92,711 hnenah Covid-19 vaccine pek a ni tawh a, pek tura ruahman zat chu mi 2,02,188 vel a ni. Tunah vaccine neih sa 50,000 vel a la awm. Vaccine a thlen belh chuan kum 45 chin lam pek zawh theih beisei a ni.