Duhoma'n MLA hlawh pung a la ve leh tho; MNF-in Zawma dah bo an tum - Zodintluanga

Congress Legislature Party (CLP) leader leh MPCC treasurer Zodintluanga Ralte chuan Lalduhoma chu MLA hlawh pun pass duh lo, hlawh pung la tho a nih avangin Mizoram hruai tlak loa a ngaih thu a sawi a; MNF-in Serchhip by-election-ah Vanlalzawma an dintir chu amah dah bo tumnaa a ngaih thu a sawi bawk.

Zodintluanga Ralte hian nimin khan Serchhip Press Club-ah thuthar thehdarhtute a kâwm a; Lalduhoma insûm duh loh vang leh Speaker luhlul avangin thla ruk chhung Serchhip bialin MLA an neih loh phah tih sawiin, "Chapona pakhat vang a ni a tih theih. By-election chu rorel lai ta tih ṭhin ni mah se, tunah chuan tling tur sawi thiam harsa khawpin boruak a awm a ni," a ti.

CLP Leader chuan, Assembly GPC-ah Lalduhoma a tel ṭhin thu sawiin, "GPC chuan MLA hlawh pun a rél a, mahse, House-ah Pu Duhoma chuan Val Upa Council-in an pawm lo a, kan pass thei lo a ti a nih kha. Mahse, hlawh pung zawng zawng a la leh vek si a ni," a ti a; GPC-in MLA hlawh pun a rel chu Lalduhoma tela rèl a nih thu a sawi.

MNF candidate Vanlalzawma chungchangah Zodintluanga chuan, "CM Pu Zoramthanga hian tling turin a duh tak tak lo. A tlin duh se, Aizawl West-I by-election-ah khan an dah daih tawh ang. Serchhipa an dah hnuah pawh CM berin minister a nih tur a tiam duh lo a, a kal pawh a kal zui lo. Serchhip by-election-a an dintir hi amah dah bo tumna niin a lang," a ti.

MPCC Treasurer chuan, Congress candidate PC Laltlansanga chu a seh tawh seh ngat ngat chi a nih thu a sawi a, bial tana hmasawnna tura thawk atana ani anga chak an awm lo niin a sawi bawk.

MLA zin loh bill lâk chungchanga zawhna chhangin Zodintluanga chuan, Lalduhoma'n engmah hre loin hming an ziak (sign) a, an la mai anga a sawi chu a dik lo niin a sawi a, "Kum 2003-ah MLA kan ni ve a, Free Travel Scheme a awm a, actual pay receipt vel kha Assembly thawktute'n min lo tihsak mai ṭhin. Kan pawisa lâkna tur kha chiang takin Assembly thawktute'n min hrilh a ni. Keini chhungkua phei chuan kan zinnaah kan chawi belh a ni," a ti.

MPCC vice president Lalsawta pawhin thu sawiin, Serchhip bial mipui chu an vote hralh lo turin a chah a, "In tu leh fate chenna tur ram kan din mek a, pawisa la ula, vote suh u, tih hi thil ṭha a ni lo," a ti a; Mizo chu hnam rinawm an nih thu a sawi.

Congress party chu an danglam a ṭul nia sawiin Lalsawta chuan, "Kan danglam ang. Mi ṭha báwm siam kan tum lo a, ṭhat loh theih lohna báwm siam kan tum zawk. Sorkar ṭhaah retheih a zahthlak a, sorkar ṭhaah chuan hausak hi rualpàwlna a ni. Pawisa hi hman dik chuan a tlo lutuk," a ti. PC Laltlansanga chu opposition MLA ni tura a mi awh ber a nih thu a sawi bawk.