MCC bawhchhiatna awm mah se, hêk kan tum lo - TBC Lalvenchhunga

ZPM party-a PAC member TBC Lalvenchhunga chuan nimin khan Serchhip Press Club-ah thuthar thehdarhtute kâwmin, Serchhip College zirlai hmeichhe pakhatin MNF candidate vote tura a sàwmna video chu Model Code of Conduct (MCC) bawhchhiatna nia a lan rualin, hêkna thehluh an tum loh thu a sawi.

MNF party-in Serchhip by-election atana video advertisement/ fakna an siam video-ah chuan, Serchhip College zirlai, college t-shirt hàa college tuala thu a sawi lai a lang a; sorkar leh MNF candidate Vanlalzawma hmalaknaa Serchhip College zirtirtute leh zirlaite aiawhin lawmthu a sawi bakah, MNF candidate vote turin a ngen a ni.

Sorkar college-ah sorkar hnathawkte'n party tih bik neiin public property chu vote dilna atan an hmang tih theih a nih thu sawiin TBC Lalvenchhunga chuan, "Kan party hruaitu te, kan Legal Board-te leh mithiam dangte biakràwn a ni a, video hian Election Model Code of Conduct a bawhchhe ngei niin kan hria. Mahse, hék ta ila, MNF candidate hi disqualified hial tâwk palh se, chutiang chu ZPM chuan ṭha kan tih loh avang leh inhêkna avanga by-election hi hmachhawn kan nih avangin official-a complaint thehluh ṭha kan ti lo a ni," a ti.

TBC Lalvenchhunga chuan, kum 2020 February thlaa budget session-ah HTE Minister-in post 98 hnawhkhah a dil pawh pek a ni lo tih sawiin, "Mipui thlan ni ve miah loin sorkar hna dah chungchangah thu a nei hian campaign kick off-a Chief Minister-in 'Hnam Rûna hna semtu' a tih kha a dik tihna nge ni a, sorkar hi a mumal lo hrim hrim?" a ti a; chutih rualin, Serchhip College zirlai leh zirtirtute an lawmpui thu a sawi a ni.

ZPM-in an sawifiahna
1. Vanlalzawma ngenna zarah Mizoram sorkarin NEC aṭangin Serchhip College administrative building sakna tur cheng nuai 1095.00 hnuh chhuah anga sawi a ni. March 24, 2021-a Planning department note sheet-a a lan danin, Planning & Programme Implementation department-in HTE department DPR siam chu March 23, 2021-ah NEC-ah an thehlut a; chutih laiin, March 16, 2021-ah MCC puan a ni a, sorkar hmalaknate puanzar khap a ni.

Serchhip College administrative building sakna tur cheng nuai 1095.00 atan Mizoram sorkarin NEC-ah DPR a thehlut ngei a, NEC-in sum an pek theih loh avangin sorkar laipuia line ministry aṭanga India hmarchhak tana 10% Gross Budgetary Support aṭanga hmuh theih a nih ringin ministry-ah dilna thehluh a ni. Kum khat a vei hnuah, MCC puan a nih thlengin sanction thâwm hriat a ni lo a, NEC website-ah April 11, 2021 (Pathianni) thlengin sanction list tarlanah hmuh tur a awm lo. PUC erawh chuan September 10, 2020 khan NEC aṭangin academic block sakna tur nuai 495 sanction an hmu thung.

2. Serchhip College-ah assistant professor regular post pali pek chungchang: MNYF-in August 8, 2018-ah press release an siamah, college 26 zirtirtu indaih lohna, regular post 151 a nih thu leh chu'ng post ruak bakah RUSA hnuaiah asst. professor, state-in 10% a tum ve tura post ruak 70 chuang la thuai turin Congress sorkar an ngen.

MNF sorkar hnu, October 25, 2019-ah asst. professor post ruak 17 hnawhkhat turin MPSC kaltlangin advertisement chhuah a ni a, January 29, 2021-ah interview a ni. Mi 17 lak an ni a, reserved-ah mi 32 an awm. Serchhip biala by-election puan hma daiha thil thleng tawh a ni.