SDG kalpuiah Mizoram a che ṭha

Regional Consultation of North Eastern Region Sustainable Development Goals (SDGs) Index & Dashboard chu nimin khan a vawi khatna atan State Convention Centre, Shillong-ah ṭan a ni. Mizoram chu hmarchhak state zinga SDGs tihlawhtling ṭha ber dawttu (pahnihna) a nih thu an tarlang.

Regional Consultation hi ni li chhung awh tur a ni a, Ministry of Development of North East Region (DoNER), NITI Aayog leh United Nation Development Programme (UNDP) ṭangkawp buatsaih a ni. SDGs tihlawhtling tura hmarchhak state hrang hrangte hmalakna leh thlen chin tehna tur tehfung (indicator) zir chian a ni ang.

Sorkar thuchhuah tarlan danin, kum 2018 aṭang khan kum tin NITI Aayog-in India ram state hrang hrang leh union territory (UT)-te'n SDGs an tihhlawhtlinna kawnga an thlen chin leh dinhmun tlangpui tarlangin, ranking a tichhuak ṭhin.

Kum 2018 khan India ram pumah Mizoram chu parukna niin, 2019-ah erawh indicator ṭhenkhat ennawn a nih avangin 12-na a ni a; kum 2020 ranking thar berah Mizoram chuan 66% hmuin, pahnihna a ni. Hmarchhak state hrang hrangte dinhmun tlangpui tarlannaa a lan danin, hmarchhaka district 118 tana ranking tihchhuahah Mizoram mark hmuh chu national level-a mark hmuh aiin a sang zawk a ni.

SDG kalpuinaa NE state dinhmun
Rank State
1-na Sikkim
2-na Mizoram
3-na Tripura
4-na Manipur
5-na Nagaland
6-na Arunachal Pradesh
7-na Meghalaya
8-na Assam