COVID-19: Mizoram dinhmun : Hripui vei mi 7 hmuh belh a ni

April 11, Pathianni khan Mizoramah Covid-19 vei mi pasarih hmuh chhuah a ni a, an zing­ah natna (symptom) lang mi paruk an awm. Pathianni zan vêk khan State Referral Hospital (ZMC)-a Covid-19 vei enkawl lai mi pakhat a thi a, nimin khan ṭha takin mi pali chhuahtir an ni thung.

Covid-19 positive hmuh thar mi pasarih chu RAT hmanga Aizawla hmuh chhuah vek an ni a; an zinga paruk chu Mizoram chhunga kái chhâwng an nih bakah, symptom nei mi paruk an awm. ZMC laboratory leh TrueNAT-PCR hmanga swab sample endik zingah hripui vei an awm lo.

Mizoramah Covid-19 vei mi 4,619 hmuh chhuah a ni tawh a, mipa 3,331 leh hmeichhia 1,288 an ni. Nimin tlai dar 5 thleng khan mi 4,468 (96.73%) chhuahtir an ni tawh a, mi 12 (0.26%) thi tawhin, enkawl mek mi 139 (3.01%) an awm. 

April 11, Pathianni khan ZMC laboratory-ah swab sample 48, TrueNAT-PCR hmangin Serchhipah sample 20 leh RAT hmangin Aizawl, Kolasib leh Saitual district-ah sample 452 endik a ni a; sample endik zawng zawng chu 520 niin, chu'ng aṭanga hripui vei hmuh pasarih chu 1.34% a tling.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,672 hmuh chhuah a ni tawh a, TrueNAT-PCR hmangin 682 leh RAT hmangin 1,264 hmuh chhuah a ni tawh.

April 11, 2021 thlengin Mizoramah swab sample 2,62,830 endik a ni tawh a, chu'ng aṭanga Covid-19 positive hmuh tawh zat 4,619 chu 1.76% a ni. Hripui vei hmuh tawh zinga mi 2,196 chu Mizoram chhunga kái chhâwng an ni a, mi 2,423 chu Mizoram páwn aṭanga an rawn luh hnua hmuh chhuah an ni thung.

Nimin khan hripui laka fihlîm tawh mi mi pali chhuahtir an ni a; Durtlang BSUP CCC aṭangin mi pahnih leh Pushpak CCC Aizawl leh Champhai CCC aṭangin mi pakhat ve ve an chhuak a ni. Mizorama district 11 zingah hripui vei mek awm lohna district pathum chiah (Siaha, Saitual leh Khawzawl) a awm rih a ni.

Covid-19 vei hmuh tharte
Bawngkawn South - 1: Hmeichhia kum 27, symptom neih vanga private hospital-a sample endik, hri a kàina hriat loh.
Bethlehem Veng - 3: Mipa kum 2 & 13 leh hmeichhia kum 25; positive hmuh tawhte nena inkungkaihna nei, pahnihin symptom an nei.
Kanan Veng - 2: Hmeichhia kum 30 & 63, positive hmuh tawhte nena inkungkaihna nei, symptom nei ve ve.
Ramrikawn - 1: Mipa kum 56, April 4-a Karimganj aṭanga haw, symptom a neih vanga private hospital-a sample endik.