Lungleiah Covid-19 dinhmun sawiho

Lunglei District Task Force on Covid-19 (DTF) chu nimin khan an chairman Kulothungan A, bawrhsap hoin DC conference hall-ah an ṭhu a, an district-a Covid-19 hri léng laka invênna tura hmalakna kal mek leh hmalak tur pawimawhte an rél.

DMR department-in inkaihhruaina a tihchhuah thar chu ṭha taka kenkawh a nih theih nan ruahmanna an siam a; Lunglei district tana Dedicated COVID Health Centre (DCHC) atan Sazaikawn Urban Primary Health Centre (UPHC) an ruat. Covid Care Centre (CCC) neih sa Zobawk PHC bakah, SIRD, Pûkpui chu ruahman belh a ni a, quarantine centre atan Tourist Lodge leh DIET-te an ruahman bawk.

Lunglei chief medical officer (CMO) Dr LC Liana tarlan danin, Lunglei district-ah Covid-19 positive mipa 380 leh hmeichhia 41, an vaiin mi 421 hmuh chhuah a ni tawh a; positive enkawl mek mi pathum an awm.

RAT hmangin swab sample 6,845, TrueNAT-PCR hmangin June 12, 2020 aṭangin sample 7,994 leh ZMC-ah RT-PCR hmangin sample 1,538 endik a ni tawh a, a vaiin sample 16,377 a ni. Mi 6,907 khung hran (quarantine) an ni tawh bawk.

Covid-19 dan bawhchhiate pawisa chawitir aṭangin Lunglei police chuan May 9, 2020 aṭanga March 31, 2021 thlengin Rs. 11,78,000 an hmu tawh.

Lunglei district-ah hian Covid-19 vaccine first dose 11,933 leh second dose 2,305 pek tawh a ni.