Congress Mahila hotu MNF-ah lawm lut

Congress party-a nu ho páwl, Mahila Congress president K Remthangi chu nimin khan MNF treasurer K Vanlalauva'n MNF party-ah a lawm lut tih MNF thuchhuah chuan a tarlang. Lawm luhna inkhawm hi Mizo Hnam Rûnah neih a ni.

K Vanlalauva chuan, Congress party-a mi pawimawh tak an lawm luh chuan a hun takah MNF a zawm niin a sawi. Remthangi chuan, "Pu Zoramthanga kaihhruai hi Pathianin hriak thihin mal a sàwm mek niin kan hria. Pathian leh kan ram tan tih hi zui ve kan duh tawh a, kan chhungkuain MNF-ah kan lut a ni," a ti.

MNF tarlan danin, Remthangi hi kum 1984-1994 chhung unit-ah Mahila president a ni a, kum 1994-2012 chhung Khatla VC/VCP niin, a záwnin VC-ah term ruk thlan a ni. Kum 2011-2020 chhung Mizoram Pradesh Mahila Congress Hqrs. vice president niin, kum 2020 aṭanga Mahila president a nih mek laiin April 5, 2021-ah bànna a thehlut a ni.