Media-te chungah lawmthu sawi

Health minister Dr R Lalthangliana chuan, Covid-19 hri léng donaa hma laknaah Mizorama print media leh visual mediate'n sorkar hmalak na leh ruahmannate ṭha taka an thawhpui avang leh mipuiah inzirtirna ṭha an thehdarh ṭhin avangin lawmthu a sawi a; sorkar nen ṭang tlang zel turin a sáwm.

Dr R Lalthangliana chuan, mipuiin thu dik leh rintlak an hriat theihna tura IPR department-a thawkte'n chawlh pawh nei hman mang loa theihtawp chhuaha hna an thawk chu a fak a, "Covid-19 avangin inventhâwn thilah print media chawlh hial ngai mah se, ram leh hnam kalsiamtu pawimawh tak an nihna hre rengin an mawhphurhna hlen ngei tumin, hlâwkna beisei miah loa hun leh thâ leh thiamna nasa tak sênga PDF hmanga chanchinbu an tichhuak leh, electronic media-te'n thu dik leh zirtirna ṭha an puang zel hi ropui ka ti tak zet a ni," a ti.

Minister hian kohhran leh YMA chanchinbute'n Covid-19 chungchanga mipui zirtirna an chhuah ṭhin ah lawmthu a sawi bawk.