ZPM chu kan danglam fo tur a ni - ZPM Ṭhalai President

ZPM Ṭhalai president Malsawmzuala Ralte chuan, ZPM party chu kalphung thar hmachhuantu party an nih angin, an danglam fo tur a ni tih a sawi.

Malsawmzuala hian nimin khan ZPM Ṭhalai headquarters hruaitute leh Serchhip IOC Venga ZPM ṭhalaite nen an inkawmnaah thu sawiin, "Pathian hriatpui tlâk chauhin ke kan pênin hma kan la ang tih hi kum 2018 aṭanga ZPM Ṭhalai president ka nih tirh aṭanga tun thlenga kan kal dan, kan kal zel dan tur a ni. Inthlannaa chak tum luat vanga a mawi leh mawi lo pawh thlu loa pal bawrh bawrh hi ZPM tih ngai loh a ni. Kalphung thar hmachhuantu party kan nih ang ngeiin kan danglam fo tur a ni," a ti.

Mizoramah hmasawnna ṭha leh mi tin thleng phâk, kut hnathawka eizawngte pawh rualkhai taka chawi kân a, an thawh phu tâwk an dawn let ngeina tur policy neih a hun tawh tih sawiin Malsawmzuala chuan, "Inthlan dawn hnaiha sum tawktarh a, eng eng emaw tiam rikngawt hian hma lam min pantir lo," a ti a; a thlàwna sem aiin, thawhrimna leh taimâkna hmanga mahni kea dintir lam hawia ke pên a ṭul thu a sawi.

ZPM Ṭhalai President chuan, mipui, a bikin, thingtlang lama mite voter an nihna lai chauh thlir a, sum leh pai hmanga chhaih kâwi chu bànsan a hun tawh thu a sawi a, "Lei rem rapin hmasawn ve se la, khawvel changkanna rualin ke pên ve rawh se tih hi kan ngaihtuahnaah a awm ve ṭhin. Chu thil thlentir thei tura kan ngaih ZPM kan zawm mai a ni," a ti a; Serchhip biala by-election neih turah Pathian malsawm tlaka campaign turin an party mite a chah a ni.