Japan palai leh CM an inkâwm
India rama Japan ambassador Kenji Hiramatsu chuan Aizawl a rawn tlawh a; nimin khan chief minister Zoramthanga a kawm bakah, thuthar thehdarhtute a kâwm a, Japanese International Cooperation Agency (JICA) hnuaia agriculture lama intodelh tura hmalaknate chu kalpui zel a nih tur thu a sawi.
Japan sorkar palai hi Chief Minister nen hian CM Banglaah an inkâwm a; Mizoram leh Japan thawhhona hnathawh mek leh thawhho zel dan tur an sawi dun a ni. Kenji Hiramatsu hi New Delhi-a Japan Embassy-a counsellor (Economic) Takuma Kajita chuan a ṭawiawm.
Kenji Hiramatsu chuan, Japan sorkarin Mizorama hna kal mek a neih, National Highway no. 54 - Aizawl-Tuipang kawng siam leh Japanese International Cooperation Agency (JICA) hnuaia agriculture lama intodelh tura hmalaknate chu kalpui zel a nih tur thu a sawi a ni.
Chief Minister chuan, mau hmanga Mizoram hmasawn leh intodelhna hna thawh theih dan tur a sawi a; Hiramatsu pawhin ṭha tihpuiin, chumi atan chuan mithiamte inbe tawn se, an ti.
Mizoram leh Japan chu khuarel chhiatna tâwk fo ṭhin an nih thu sawi lan a ni a; Japanese Ambassador chuan, khuarel chhiatna laka inven leh inpuahchah lâwk dan hun rei tak an lo zirchian tawhnate leh technical resource-te chu Mizoramin a hman ṭangkai ve theih dan Chief Minister a sawipui a ni.
Ram pahnih inlaichinna a ṭhat zawk theih nan intlawh tawn theih nan programme siam ṭhin ṭha a tih thu Japanese Ambassador chuan a sawi a; chutiang atan chuan Mizoramah kawng dap theih dan tur leh, Mizo zinga Japanese ṭawng zir duhte tan class hawn chungchangte an sawi dun bawk.
Press mite'n eco-tourism lama Mizoram dinhmun leh theihna a neihte chungchang zawhna chhangin Kenji Hiramatsu chuan, Mizoramah eco-tourism-in nasa takin hma a sawn theia a hriat thu leh, hmalakna atana hmun ṭha leh phûrawm tak nia a hriat thu a sawi a ni.