BCM Assembly neih mek a ni
Baptist Church of Mizoram (BCM) kohhran rorelna sang ber, Assembly vawi 123-na chu March 6, Nilaini zan khan Lunglei Venglaia Calvary Baptist biak-inah ṭan a ni a, thupui chu 'Isua'n ro a rel' tih a ni. Nimin khan rorel an ṭan a, Pathianni zanah a ṭiak ang.
BCM Assembly-ah hian nimin khan BCM president Rev. PC Liandula'n a kaihruai a; rorel palai mi 1,300 vel tel tura beisei a ni a, nimin khan rorel palai 1,062 an kal. Agenda zingah - Kristiante hunpui - Krismas leh Good Friday tibuai zawnga programme siam lo tura sorkar laipui ngen chungchang, BCM inkhawmpui dâwl thei tur hall lian sak rawtna te, fa nei tamte pawisa pek rawtnate a tel.
Agenda-te chu Area Baptist Council (ABC) aṭanga lut 27, Executive Committee, Central Committee, Mission Committee, Service Committee, Nomination Committee thu rel tawh report leh pawmpuina turte a ni.
BCM Assembly rorel inkhawm hi March 9, Inrinni thleng neih a ni dawn a; Pathianni-ah pastor atan mi pariat nemngheh an ni ang.
Mizoram Baptist Kohhranah hian member mi 1,80,000 vel an awm mek a, Serkawn, Lunglei-ah hmunpui an nei. India ram state hrang hrang bakah, Andaman Island, Nepal, Bhutan, Bangladesh, Myanmar, Thailand, Cambodia, China, Indonesia, Kenya leh Tanzania-ahte missionary an tir mek a ni.