March 11 aṭangin Mizoramah Lokayukta kalpui dawn

Mizoram sorkar chuan eirûkna chhuia eirûkna thubuai ngaihtuahtu tur Lokayukta chairman tur a ruat tawh a; chairman atana ruat Lalsawta, IAS (Rtd) chu March 11, 2019-ah lak luh a ni dawn a, lak luh a nih aṭangin Mizoramah Lokayukta a a taka kalpui ṭan a ni dawn.

Vanglaini palai zawhna chhangin Law & Judicial minister TJ Lalnuntluanga chuan, Lokayukta Chairman tur ruat a nih tawh thu a sawi a, "Kan Chief Minister zahawm takin Lokayukta din thuai a ngai pawimawh em a, tihfel ngai zawng zawngte rang takin min tihfel zung zung a ni. Chiarman hi ruat vat kan duh avangin, video conferencing-te'n meeting koh a ni," a ti.

Lokayukta Chairman tur ruattu Selection Co­mmission-ah chairman chu Chief Minister a ni a, member-te chu - Assembly Speaker, Opposition Leader leh Gauhati High Court Chief Justice emaw, a aiawh emawte an ni.

Law & Judicial Minis­ter sawi danin, Lokayukta chairman atana ruat Lal­sawta chu March 11, Thawh­ṭanni-ah Raj Bhavan Durbar Hall-ah Governor Kummanam Rajasekha-ran-a'n rinawm­na thu tiamtirin a la lut dawn a, lak luh a nih aṭangin Lokayukta chu a taka kalpui ṭan a ni dawn. Lokayukta member turte erawh chu sum awm dan azirin a tahtawla ruat a ni ang.

Lokayuta hi mimalin in luahin an kal phawt dawn a, thawktu tur ṭhenkhat chu lak an ni tawh a, Law & Judicial department-a thawktu ṭhenkhate'n an pui rih dawn a ni.