Sipaite'n chhim lam khua an chhuahsan

Lawngtlai district chhung, Mizoram chhim tâwp hnaih khaw ṭhen­khata February thlaa Assam Rifles sipai dah zinga eng emaw zat chu March 3, 2019 khan an awmna aṭanga lak chhuah an ni a, khaw ṭhenkhatah tun thlenga la duty an awm bawk.

February chawlhkar hnihna vel aṭanga Vaṭhuam­pui khuaa Assam Rifles sipai inkulhte chuan March 3, Pathianni khan Vaṭhuampui an chhuahsan a; Vanglaini palai zawhna chhangin Vaṭhuampui Branch YMA secretary K Rosiamliana chuan, "An chhuah chhan kan hre bik lo. An chhuah hmain khawtlang hruaitute nen inhmuh an tum thu an sawi a, mahse, kan inhmu ta lo," a ti.

K Rosiamliana chuan, Vaṭhuampui piah lam, Myanmar nena inrîna lam hnaih khaw pathum - Tuichawngtlang, Tui­sentlang leh Zawngling khua leh Vaṭhuampui thlen hma Saibawh khuaa sipai awmte pawh an chhuak vek niin a sawi a; sipaite kalna lam erawh an hriat loh thu a sawi bawk.

Hetih lai hian, Mizo­ram leh Myanmar inrìna khua, Zochachhuah leh Kaladan Multi Modal Transit Transport Project (KMMTTP) kawngpui dung leh a chhehvel khuaa sipai awmte erawh chu an la awm zui reng niin Lawngtlai aṭanga thu dawnna chuan a sawi.

Lawngtlaia DDK strin­ger Lalngheta Renthlei chuan, Zochachhuah leh a chhehvelte chu nimin khan Lawngtlai DC leh DC pisaa official-te'n an tlawh tih a sawi a; tun dinhmuna sipaite awm dan leh khaw hrang hranga mipuite nunphungah thu thar a awm rih loh thu a sawi bawk.