MRP hnuaia security-a thawktu dah dan Police guidelines angin kalpui a ni dawn

Inspector General of Police (IGP), Head­quarters changtu John Neihlaia chuan, Mizoram Police hnuaia security-a thawktu dah an nih ṭhin dan chu Police Guidelines nen a inmil loh avangin, Police Manual mila kalpui a nih tawh tur thu Vanglaini a hrilh.

John Neihlaia chuan, All India Police Guide­lines-ah secuirty-a awmte chu VIP-te vengtute an nih avangin, sipai rau rauah pawh rilru leh taksa (mentally & physically)-a mi dang aia chungnung tur an nih thu a sawi a, "Security-a awm turte chu kum 21-35 inkar an ni tur a ni a, kum thum aia rei awm pawh phal a ni lo," a ti.

Kum 1977-ah Mizo­ram IGP chuan order tichhuakin, Mizoram bikah chuan security-ah kum 21-40 inkar awm phalsak an nih thu sawiin John Neihlaia chuan, "Mizoram Police Manual, 2015-ah chuan security-a awmte hi kum thum an awm pêl a nih pawhin, an rank azirin kum nga thleng awm phalsak tura tih an ni," a ti a; rank sang deuhte chu kum nga thleng pawh manual ang chuan an awm theih thu a sawi.

IGP chuan, security chu hahdamna hmuna ngaiin awm dil an tam thu sawiin, "Kum nga aia rei, kum 40 aia upa tawh security-a awm eng emaw zat an awm. Attached-te'n indah a ni a, an chhuah dawnah an hreh leh ṭhin si. Hmun dangah police indaih lohna a awm laiin, security-ah chuan mamawh aia tam an awm a ni," a ti.

John Neihlaia chuan, security-a awm theih dan kalphung chu Police Guidelines leh Police Manual anga siamṭhat Home Minister hnenah a rawt thu sawiin, "Home Minister pawhin ka rawtna ṭha tiin tihdanglam hna kalpui mek a ni. A vai chuan siamṭhat nghal vek erawh a har mai thei a, a tahtawlin kan ti zel ang," a ti a; Guideline leh Manual pêla security-a awmte chu hmun dangah lâk chhuah an nih tur thu a sawi.