YMA anga pawl ṭangkai a váng - Robert Romawia
Tuichangral South Group YMA chuan, nimin khan Lungchhuan community hall-ah inkhawmpui an hmang a; an hun hmanpuitu minister Robert Romawia Royte chuan, YMA anga pawl ṭangkai leh hlu a vân thu a sawi.
Robert Romawia chuan, YMA chu kum bithliah te, kohhran leh kawng danga inthliarna awm lohna pawl a nih avangin a hlu hle tih sawiin, "Hmarchhak state hrang hrangahte hna kan lo thawk tawh ṭhin a, an hnam kalphungte pawh phak ang tâwkin ka zir ve ṭhin. YMA anga pawl ṭangkai leh hlu hi a váng hle a ni," a ti.
Ṭhalaite chu tum sang tak leh rilru paukhauh tak nei tura fuihin Robert Romawia chuan, "Zirna leh hriatna hi mihring chakna hnár a ni a, i ngaihlu deuh deuh ang u. Zirna lama kan lo thleng sang vak lo a nih pawhin hnual nan hman tur a ni chuang lo," a ti a; khawvelah zir sang lo sumdawnna leh thil siam lama hlawhtling sawi tur an tam thu a sawi.
Sports Minister hian inkhawmpui thlengtu Lungchhuan Games & Sports chu jersey set, football, volleyball leh net a pe a; Lungchhuan khawtlangin an mamawh an dilte theihtawp chhuaha tihhlawhtlinpui a tum thu a sawi.
Conference hi Tuichangral South Group YMA president R Lalremkunga'n a kaihruai a; secretary C Thanmawia tarlan danin, an group-ah hian YMA branch joint pakhat leh branch 19-ah member 9,803 an awm a ni.