Hindi zirlaite exam duh lo zel
Mizoram Hindi Training College (MHTC)-a zirlaite chu March 6, Nilaini aṭanga exam an boycott chu niminah pawh an la chhunzawm a, an principal Louis Hauhnar dah chhuah a nih hma chuan exam emaw, class emaw neih loh an tum thu an sawi.
Tarlan tawh angin Mizoram Hindi Training College Trainees' Union (MHTCTU) bultumin MHTC-a zirlaite chuan an college principal Louis Hauhnar laka an lungawi lohna lantirin, exam an boycott a, zirlai zingah exam an awm lo.
MHTCTU hruaitute chuan, niminah erawh chuan zing lamah college thuneitute'n hostel-a awmte exam tura an vau avangin zirlai pathum chu an exam niin an sawi a, "Zirlai dang zawng chu kan exam lo. Kan Principal hi a awm chhung chuan college-ah kal mah ila, exam/class kan nei dawn lo," an ti.
Tarlan tawh angin, zirlaite lungawi lohna hi Higher & Technical Education department official-te chuan an ngaihven a; Nilaini khan HTE Joint Director-in zirlaite chu lungawi lohna an lantir mek titawp tura ngenin, an thil phût zinga tihhlawhtlin theih awmte tihhlawhtlin a nih tur thu a hrilh. Mahse, zirlaite chuan an Principal ni mek chu sawn a nih loh chuan lungawi lohna lantir chhunzawm zel an tum thu an sawi a, inremna an siam thei lo a ni.