Hlawh hmu tlaka hna thawh tur - Minister Lalruatkima

All Mizoram DRDA Employees Association (AMDEA) chuan nimin khan Agriculture conference hall-ah General Body Meeting an nei. An hun hmanpuitu Rural Development minister Lalruatkima chuan, hlawh hmu tlaka hna thawh tur a nih thu a sawi.

Lalruatkima chuan, sorkar hnathawkte inelna tur chu 'Tu nge hna thawk ṭha ber' tihah a nih thu a sawi a, "A hming mai maia thawk tur kan ni lo. Kan hnathawh reng reng felfai takin kan hlen chhuak ṭhin tur a ni. Hlawh hmu tlakin hna kan thawk tur a ni a, sorkar laipui aṭanga sum lo lut hi ṭangkai thei ang bera hman kan inzirtir a ngai," a ti.

DRDA hnathawkte chu thing­tlanga mi harsa zawkte enkawltu an nih avangin mipui tana thawk kan ni tih inhriatreng a pawimawh tih sawiin RD Minister chuan, "Mipui min dawrtute tan biak nuam tak kan ni tur a ni," a ti a; sorkar flagship programme SEDP-ah pawh DRDA thawktute chu sorkar kut leh kêa an ṭan dawn avangin theihtawp chhuah turin a chah.

AMDEA hi August 2016 khan din a ni a, member 117 vel an awm mek. A ṭum khatna atan February 16, 2017 khan General Body Mee­ting an lo nei tawh a ni.