Facebook-a thu post vangin Court-ah kal Mizo ukilte'n Court-ah an dinsak dawn lo?

Facebook group ṭhen­khata Mizorama ukilte chungchang leh ukil ṭhenkhatin ZPM an zawm chungchanga thu post leh sawi zuina ṭhenkhat avangin Aizawla ukilte chuan nimin khan Aizawl District Court-ah mi paruk lakah criminal complaint an thehlut. Facebook-a thu thehdarhtua puhte hi Mizoram Bar Association (MBA) member-te chu Court-ah dinsak an tum lo nia thu dawn a ni.

Thu dawn danin, Facebook-a Zoram Poli­tics Group-I leh group dang ṭhenkhata thu post leh sawi zuina (comment) avang hian ukil pasarihte chuan Chief Jusicial Magistrate, Aizawl Judicial District hnenah nimin khan criminal complaint an thehlut. Ukil pasarihte hian address atan Mizoram Bar Association (MBA) Office an hmang.

Court-a an hêkte chu (an Facebook profile name angin) - Robert Lalrinkima, Machhantea Vuite, Renga Kawlni, The Game Colney, Mavunga Chhakchhuak leh Elizabeth Laltlansangi te an ni.

Ukil ṭhenkhat chuan, he thubuaiah hian thil dik lo tia puh mi parukte chu Mizoram Bar Association member zawng zawngin Court-ah an dinsak dawn lo niin an sawi a, "Ukil an ruai dawn a nih chuan Mizoram páwn lama mi an chah chhuak ve tawh mai ang chu," an ti.

Chutih laiin, Mizoram Bar Association Secretary chuan, Court-a indinsak lo turin pawlin thutlukna a la siam chiah lo a, vawiin hian an ṭhukhawm dawn tih Vanglaini palai a hrilh.