Lockdown leh economy-a mithiamte ngaihdan

Ei leh bar leh ram sum leh pai chungchanga mithiam (economist)-te chuan, Covid-19 vanga lockdown puan chu Mizoram economy-in direct taka a tawrh lutuk an ring lo a, sorkar laipui economy-in a tawrh nasat dawn avang leh Mizoram chu sorkar laipuia innghat a nih avangin a tawrh tho an ring bawk. Mizoram University-a finance officer Prof. Vanlalchhawna chuan Vanglaini palai zawhna chhangin, Mizoramin industry lian a neih ve loh avangin economy-ah direct-in lockdown a tawrh a rin loh thu a sawi a, "Kan tih tur pangngai leh kan tih ṭhin pangngai kan tih chuan rei lo têah khawsak harsa lutuk loin kan awm leh theih ka ring," a ti.

Prof. Vanlalchhawna chuan, Covid-19 in khawvel economy a nghawng tih sawiin, "Khawvel economy a ṭhat loh chuan India pawhin a tuar dawn. India economy a ṭhat tawh lo sa nâk alaiin, state-te'n an tuar dawn a, chhiah tling khawmte hmuh tur ang kan hmu pha lo ang," a ti a; tih dan pangngaia kal lo a, inrenchem taka kal dan tur sorkar laipui leh state sorkarin a ngaihtuah lâwk a ṭul thu a sawi.

Lockdown chhungin economy-in a tawrh viau thu sawiin Prof. Vanlalchhawna chuan, "Thawktu hrang hrang leh zirlaite pawh kawng hrang hrangin a nghawng. Ni tina inhlawhfa chawp tan a hrehawm lehzual ang," a ti. Pachhunga University College-a economics zirtirtu Lalthlamuana Ralte chuan, lockdownin a nghawng nat ber tur chu ni tina eichawp zawngte an nih thu sawiin, "Dawrkai ho pawh a nghawng nasa.

Thlabi neia hlawh late a nghawng vak lem lo," a ti a; a êng zawnga thlir chuan, vah chhuah theih a nih loh chuan mi tam takin sum an khâwl phah theih tur thu a sawi. Lalthlamuana Ralte chuan, ni tin eichawp zawngte tan state tam takin sum an theh chhuah nasat thu sawiin, "Supply hi a la awm reng rih avangin tuna an mamawh ber chu sum leh pai a ni. Tunah chuan local task force-te'n heng ho hi an buaipui thei a, an buaipui thei reng ang em? Sorkarin ngaihtuahna a sên a ngai viau," a ti.

Mizoram chuan company leh industry lian a neih ve loh avangin direct takin lockdown-in economy-ah nghawng a neih loh tur thu sawiin Lalthlamuana Ralte chuan, "Kan economy innghahna ber hi sorkar sum che vel a ni. Sorkar hian sum harsatna a neih loh a, sorkar hnathawkte'n hlawh an lâk theih a, sorkara bill táng a awm loh chuan a tìr lamah chuan min nghawng na lutuk loin a rinawm," a ti a; chutih rualin, Covid-19 vanga khawvel pum economy tlahniamin India ram a nghawng dawn avangin Mizoram pawh a nghawng zel tur thu a sawi.