Health Minister-in thawktute a fak
Health minister Dr R Lalthangliana chuan nimin khan thuchah a tichhuak a, Covid-19 vanga harsatna thleng mekah Health department-a thawkte chu an inpekna leh thawhrimnaah a fak.
Dr R Lalthangliana chuan, Health department-a thawkte'n an hna ṭheuh tlin tak leh rim takin an thawk tih a hriat thu sawiin, "Mahni nunna mai ni loin, in hmangaih in chhungte nunna hial pawh thàp tak meuh meuhin in hna ṭheuh rim takin in thawk mek tih ka hria.
Ka chawimawiin ka zah che u a, ka chhuang tak meuh che u a ni," a ti. Health department-a thawkte chu an duhthusam, an mamawhte an pek theih lohna chin a awm tih sawiin R Lalthangliana chuan, "A hrehawm pawh ka ti hle.
Eng pawh ni se, a theih ang angin in tan ka theihtawp ka chhuah ve zel a ni," a ti a; an hmaah a ding tlat dawn tih hre reng turin a chah. Covid-19 avangin eng chen nge Mizoram a buai dawn tih hriatthiam a har tih sawiin Health Minister chuan, "Rim lehzuala kan thawh a ngai a nih pawhin Pathian rawngbawlna tak tak a ni tih hriain, inpekna nasa tak, in thawh mek dan ang hian thawk chhunzawm zel turin ka ngen che u. Inthlahdah thiang kan ni ve lo," a ti.