Cheng nuai thum nei turin mipuite'n MNF an vote tling - Lal Thanhawla

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-ah thu a sawi a, "MLA inthlan neih zawh tâkah cheng nuai thum nei turin mipuite'n MNF an vote tling a ni," a ti.

Lal Thanhawla chuan, MNF President-in inthlan hmaa a intiamna a tihhlawhtling dawn em tih mipuiin an thlir reng tih sawiin, "MNF-te mipuite'n cheng nuai thum nei mai turin an vote tling a ni. Tuirialah college kal lai mi pahnih an awm avangin MNF President-in college a din dawn. A bial chhunga in hmun nei lo zawng zawngte pawh in hmun pek a tiam a ni," a ti a; MNF President chuan BRTF pawh sawn chhuah a tum tih a sawi.

Chief Minister ṭum nga a nih chhungin cheng khat mah a eiru lo nia sawiin Lal Thanhawla chuan, "Eiru lo mah ila, eirua puh ka nih ringawt khan a inthlahrunawm duh hle a, biak-inahte hian kan inkiltawih hle. Tuna kan CM ka fakna em em chu, cheng vbc. 9 vel eirûk thubuai a nei mek chung pawhin a la ṭawng pâwng pâwng thei a ni," a ti.

MPCC President chuan, BJP kuta India ram a awm reng chuan India ram a chhe dawn nia sawiin, "Tun hnaiah an tlahniam nasa hle. A bik takin sumdawng hausa rual hoin an lawm lo hle a, Ambani-te tih loh chu," a ti a; ringtu an nih avang leh Citizenship (Amendment) Bill avangin MNF-te'n NEDA leh NDA an chhuahsan dawn em tih chu ngaihtuah tham a nih thu a sawi.

Lengpui Airport-ah Jet Airways an service tawh loh chhan chu a ṭum hmun chhiat vang a nih loh thu sawiin Hawla chuan, "Jet Airways hi sum lamah an tlakchhiat vang a ni. An chairman UAE-ahte zinin, airlines company dang thawhpuiahte a sáwm a ni. Kan hun lai khan Indigo rawn service turin kan bia a, April 2019 vel an tum a, an thei ang em ka hre lo," a ti.

Aizawl aṭanga Assam Rifles sawn chhuah chungchangah MPCC President chuan, "Ka hriat ve chin chu, state kan nih tirha prime minister Rajiv Gandhi lo kal khan Assam Rifles sawn chhuah hi a sawi a, sorkarna kan chan hnuah kan bawhzui a ni," a ti a; Congress-in Mizorama sorkarna an chan hnuah Rajiv Gandhi thusawi chu an bawhzui niin a sawi.

Lal Thanhawla chuan, Assam Rifles-te chu ram pahnih an kawhhmuh tih sawiin, "Zokhawsang an thlang a, kan hun laiin LSC vel kan tifel hman lo a, MNF hun laiin tihfel a ni. Hei hi thudik a ni. Building sak hna chu Assam Rifles ho mawhphurhna a ni a, kawng, tui leh êng chu state sorkar mawhphurhna a ni thung. An insawn dawn rau rau chuan AR hian insawn an hreh lo," a ti.

Zokhawsanga Assam Rifles hmun chu peih thawkhat a ni tawh tih sawiin Lal Thanhawla chuan, "An chhuahsan hma pawhin kawng zauhna turte kan hun lai khan an commadant-te nen kan enho tawh. Lammual leh a chhehvel deuh chiah chhuahsan an tum a, hmun dang pawh an chhuahsan theihna atan kan nawr a ni," a ti a; eng chin nge an chhuahsan dawn a hriat tawh loh thu a sawi.