Hindi zirlaite'n exam boycott an titawp
Principal laka lungawi loh vanga exam duh lo Mizoram Hindi Training College (MHTC) zirlaite chuan niminah pawh khan exam an la boycott chhunzawm zel a; mahse, Higher & Technical Education (HTE) department hotute leh MZP hruaitute nen nimina an inbiak hnuah, exam boycott chu an titawp rih.
MHTC zirlaite hian an principal Louis Hauhnar laka an lungawi loh avang hian an principal chu dah chhuak turin thuneitute an ngen a, dah chhuah a nih hma chuan exam/class chhunzawm an tum lo. March 6 aṭangin second terminal exam an boycott ṭan a, March 7 leh 8-ah an chhunzawm leh a ni. HTE department hotute leh MZP hruaitute hmalakna avangin zirlaite chuan exam boycott tihtawp an remti a; a duh an exam ang a, a duh lo chu exam lo mai turin an inrem a ni.
MZP tarlan danin, MHTC zirlaite harsatna tawh chungchangah hian MZP hruaitute leh MHTC zirlai hruaitute'n nimin khan HTE joint director Ramhmangaiha an hmu a; chumi hnuah MHTC zirlaite nawrhna hmun college-ah an sawiho leh bawk.
MZP hruaitute chuan, MHTC zirlaite harsatna chu an hriatpui thu te, MHTC-ah thil dik lo tam tak a awm thu te, zirlaite harsatna chu MZP-in theihtawp chhuaha hma an lakpui tur thute an hrilh. Second terminal exam neih mek chu a duh chuan exam a, a duh lo tan exam loh theih tura inbiakrem a ni.