Zu khapna dan put luh remti April 1 aṭangin zu khap tum a ni

Council of Minister-te nimina Chief Minister's Office (CMO) Cabinet room-ah ṭhukhawm chuan, tun thlaa Assembly budget session neih turah Mizoram Liqour (Prohibition) Bill, 2019 put luh an remti. Mizoram sorkar chuan April 1, 2019 aṭangin Mizoramah zu khapna dan hman ṭan a tum.

Cabinet meeting-ah hian Excise & Narcotics department agenda, 'Proposal for Introduction of the Mizoram Liqour (Prohibition) Bill, 2019' chu sawiho a ni a, an pawm a ni.

Hetih lai hian Excise & Narcotics department chuan nimin khan hriattir chhuahin, April 1, 2019 aṭangin zu khapna dan hman ṭan tum a nih thu a tarlang. Hriattirnaah chuan, "April 1, 2019 aṭangin Mizoram sorkarin Liquor Prohibition dan hman a tum avangin, Mizoram sorkar hnuaia bonded warehouse, liquor vendor, micro brewery leh liquor licence in a club, lodgings or hotel licence neite'n zu stock neihte 31.3.2019 ral hmaa tiral vek tura hriattir an ni e," a ti.

Nimina Cabinet meeting-ah hian agenda 19 a awm a, he thu ziah lai hian an la zo lo. Hriat theih chinah Cabinet hian Tuikual South-a Agriculture department ram leh building Mizoram Civil Pensioners' Association, Mizoram Class-I Contractor Association leh Tuikual South Local Counil hnena pek rawtna an pawm a ni.