Aizawlah Chetan Bhagat leh ṭhalaite an inkâwm
Young Indians (YI), Mizoram Chapter chuan India rama ziaktu lâr Chetan Bhagat chu Aizawlah an chah chhuak a; March 7, Ningani zan khan Vanapa Hall-ah Bhagat hian 'Life - Success & Happiness' tih thupui hmangin mipui hmaah thu a sawi.
Chetan Bhagat hian Vanapa Hall-a hun a hman zawhah Warehouse Cafe, Folkland Park-ah amah ngaisangtute tan 'Meet & Greet' hun a hmang leh a; kal khawmte nen hmaichhana inkawmna hun ṭha tak hman a ni.
Chetan Bhagat chah luttu YI Mizoram Chapter chairman LV Lalthantluanga chuan, sum tam tham taka lehkhabu ziak mi leh thusawi thiam chah luh chu 'risk' a ni tih sawiin, "Chutih rualin, Mizo ṭhalai zawng zawng hian infiamna leh zai lam ringawt kan hawi bik lo. Vanapa Hall-a mipui pungkhawm zat kan hmu a, zawhna leh chhanna hun kan thlir a, hlawhtlinna kan hmu," a ti a; Chetan Bhagat an sawm chhuahna theihna tura national lama YI-a an thawhpui, sponsor leh hlutsaktute chungah an lawm thu a sawi.
YI hi kum 2002-a din niin, Confederation of Indian Industries (CII) hnuaia ṭhalai pawl a ni a; India ram siamṭhat leh hmasawnna kawngah
ṭhalaite'n thâ an thawh ve theihna tura hmalak an tum a ni. India ram hmun hrang hrangah chapter 43 an din tawh a, Mizoram hi chapter 43 zinga pakhat a ni. India ram chhung bakah, ram páwn thlengin an awm tawh a, member 20,000 chuang an awm. G-20 Summit-ah pawh India sorkar chuan ṭhalaite aiawh atan YI mi a tír ṭhin a ni.